Ағымдағы жылдың бірінші тоқсанында Астана қаласы бойынша Ішкі мемлекеттік аудит департаменті 12 аудиттік іс-шара өткізді. Тексерулер барысында 7,8 млрд теңге көлеміндегі бюджеттік қаражат қамтылды. Бұзушылықтар осы соманың басым бөлігін, яғни 7,4 млрд теңгені немесе тексерілген көлемнің 94,9%-ын құрады.
Департамент мемлекеттік аудит объектілеріне бұзушылықтарды жою туралы 11 нұсқама жолдады, оның 4-і толық көлемде орындалды, ал 7 нұсқаманың орындау мерзімдері өтпеген немесе түрлі объективті себептермен ұзартылған.
Қаржылық бұзушылықтардың жалпы сомасы 143,7 млн теңгені құрады, ол жұмыстарды орындау, қызметтер көрсету, тауарлар жеткізу және есепке алу бойынша, сондай-ақ бюджетке қайтару үшін орындауға жатады.
Осы бұзушылықтарды жою бойынша қабылданған шаралардың сомасы 55,6 млн теңге болды, бұл анықталған бұзушылықтардың 38,7%-ын құрайды.
Ең көп бұзушылықтар мемлекеттік сатып алу саласында тіркелді — 5,46 млрд теңге. Сондай-ақ, мемлекеттік мүлікті басқаруда (1,17 млрд теңге), ағымдағы шығындарды жүргізуде (454,2 млн теңге), инвестициялық жобаларды және концессиялық жобаларды іске асыруда (379,6 млн теңге), сондай-ақ бухгалтерлік, бюджеттік есеп жүргізу және қаржылық, бюджеттік есептілік жасау салаларында елеулі ауытқулар анықталды.
Әкімшілік жауапкершілікке 5 лауазымды тұлға тартылды, оларға жалпы сомасы 2,47 млн теңге айыппұл салынды. Аталған сома толық көлемде бюджетке түсті. Дисциплинарлық жауапкершілікке 13 қызметкер тартылды.