Түркістан облысы бойынша ІМАД аудиторлары «КАЖсервис» ЖШС филиалының қызметінде заң бұзушылықтарды анықтады. Аудит нәтижесінде компанияның шарттық міндеттемелерді орындамағаны және бухгалтерлік есепті жүргізуде Қазақстан Республикасының заңнамасын бұзғаны белгілі болды.
Құжаттар рәсімдеу регламентін бұза отырып толтырылған. Орындалған жұмыстарды қабылдау-тапсыру актілерінде негізгі деректер болмаған, ал тауар-көлік жүкқұжаттары айтарлықтай кемшіліктермен жасалған – тасымалдаушы туралы ақпарат пен реквизиттер толық көрсетілмеген.
Сонымен қатар, аудит тауарлар мен қызметтердің ақауларына қатысты құжаттардағы ретсіздікті анықтады. Кейбір жағдайларда актілер мүлде жасалмаған, ал кейбірінде нормативтік талаптар ескерілмей, еркін түрде жазылған. Мұндай олқылықтар есептіліктегі дәлсіздіктерге және қаржылық жағдайдың бұрмалануына алып келуі мүмкін.
Аудит барысында негізсіз қаржылық операциялар да анықталды. Жұмыстарды қабылдау-тапсыру актілері мен машиналар мен жабдықтарды жөндеу актілерін рәсімдеудегі қателіктер салдарынан бюджеттен 20,98 млн. теңге заңсыз аударылған.
Анықталған заң бұзушылықтарды жою үшін Департамент аудит объектісіне нұсқама жіберіп, лауазымды тұлғаларды жауапкершілікке тарту мәселесін қарастыруда.