Алматы қаласы бойынша ішкі мемлекеттік аудит департаменті 2024 жылдың 9 айында 29 аудиторлық іс-шара өткізіп, жалпы сомасы 192,7 млрд теңгеге бұзушылықтар анықтады.
Анықталған бұзушылықтар 3,6 млрд теңге көлеміндегі қаржылық бұзушылықтарды және 189,1 млрд теңгеге рәсімдік бұзушылықтарды қамтиды. Оның ішінде 4,5 млрд теңге мемлекеттік сатып алу туралы заңнаманы бұзу фактілеріне тиесілі.
Қабылданған шаралар нәтижесінде бюджетке 146,9 млн теңге қайтарылып, қалпына келтірілді. Сонымен қатар, жалпы сомасы 16,4 млрд теңгеге аудит материалдары құқық қорғау органдарына жіберілді.
Аудиторлық тексерулер нәтижесінде 92,8 млн теңге сомасына 865 әкімшілік іс қозғалып, оның 97,1% немесе 90,2 млн теңгесі бюджетке өндірілді.
Сонымен қатар, 2,5 трлн теңге сомасына мемлекеттік сатып алуларға камералдық бақылау жүргізілді, нәтижесінде бұзушылықтарды жою туралы 4 577 хабарлама жіберілді.
Бюджетті жоспарлау және орындау кезеңдерінде, сондай-ақ бюджет қаражаты мен мемлекеттік активтерді тиімді пайдалану барысында Қазақстан Республикасының бюджеттік заңнамасын сақтамау бұзушылықтарға әкелді.