Қазақстан Республикасы Қаржы министрлігінің Ішкі мемлекеттік аудит комитетінің Астана қаласы бойынша ішкі мемлекеттік аудит департаменті "№2 мамандандырылған балалар-жасөспірімдер спорт мектебі" КММ-де аудит жүргізуді аяқтады. Аудит барысында негізгі назар Қазақстан Республикасының заңнамасының сақталуына аударылды.
Аудит нәтижесінде жалпы сомасы 12 млн 599 мың теңгеге рәсімдік бұзушылықтар анықталды. Негізгі бұзушылық тиісті құжаттардың, атап айтқанда дайындаушы зауыттың техникалық паспорттарының, кепілдік талондарының, сапа және шығу сертификаттарының болмауына қарамастан, тауарларды, соның ішінде велосипедтерді есепке алып, төлем жасаумен байланысты болды.
Анықталған бұзушылықтарға байланысты Департамент оларды жою туралы бұйрық шығарды және осы қателіктерге жол берген лауазымды тұлғаларды жауапқа тартуды ұсынды. Мекеме басшылығы жедел шаралар қабылдап, бұзушылықтар аудит ұсынымдарына сәйкес жойылды.
Қабылданған шаралар сатып алу және бухгалтерлік есеп саласындағы заңнама талаптарын сақтаудың маңыздылығын көрсетеді, бұл мекеме қызметінің ашықтығы мен тиімділігін арттыруға ықпал етеді. Департамент нұсқамалардың орындалуына және заңнаманың сақталуына бақылауды жалғастыратын болады.