Қазақстан Республикасы Қаржы министрлігі Ішкі мемлекеттік аудит комитетінің Астана қаласы бойынша ішкі мемлекеттік аудит департаменті "№1 Олимпиадалық резервтің мамандандырылған балалар-жасөспірімдер спорт мектебі" КММ-де тексеру жүргізді. Аудит барысында негізгі назар Қазақстан Республикасының заңнамасының сақталуына аударылды.
Аудит нәтижесінде жалпы сомасы 1 086,9 мың теңгеге бұзушылықтар анықталды. Оның ішінде 1 057,2 мың теңге қаржылық бұзушылықтар, ал 29,7 мың теңге рәсімдік бұзушылықтар.
Негізгі бұзушылық мекеме қызметкерлеріне 1 057,2 мың теңге көлемінде ынталандырушы үстемеақыларды негізсіз есептеуге қатысты болды. Сонымен қатар, ұзақ мерзімді активтерге амортизацияны заңсыз есептеу анықталып, бұл 29,7 мың теңге артық шығындарға әкелген.
Анықталған бұзушылықтарды жою мақсатында Департамент тиісті нұсқамалар берді, сондай-ақ қателіктер жіберген тұлғаларды жауапқа тарту туралы талап қойылды. Бүгінгі таңда бюджетке 1 057,2 мың теңге қайтарылды, ал 29,7 мың теңге көлеміндегі амортизациялық есептеулер түзетуші бухгалтерлік жазбалар арқылы қалпына келтірілді.
Қабылданған шаралар мекеме жұмысының ашықтығын қамтамасыз етуге және оның тиімділігін арттыруға, сондай-ақ мемлекеттік және қоғамдық мүдделерді қорғауға бағытталған. Департамент нұсқамалардың орындалуын және заңнаманың сақталуын қадағалауды жалғастырады.