Ағымдағы жылдың 1-ші тоқсанында камералдық бақылаумен 245,77 млрд.теңге сомасына 9943 лот көлемінде мемлекеттік сатып алу қамтылды, оның ішінде 16,6 млрд. теңге сомасына 1439 лот немесе 14,4% бұзушылықтар анықталды.
Хабарламаны тиісінше орындамағаны үшін 28 лауазымды тұлға әкімшілік жауапкершілікке тартылып (104 әкімшілік хаттама), материалдар сотқа жіберілді.
Бұзушылықтардың басым бөлігі әлеуетті өнім берушілердің өтінімдерін заңсыз қабылдамау және оларға конкурсқа қатысуға рұқсат беру, конкурстық баға ұсынысына әсер ететін өлшемшарттарды қолданбау, жоғары талаптар, «Мемлекеттік сатып алу туралы» Қазақстан Республикасы Заңының 41-бабын бұза отырып, тікелей шарт жасасу арқылы бір көзден алу тәсілін қолдану, баға ұсыныстарын сұрату тәсілімен мемлекеттік сатып алуды өткізу кезінде тауар белгілеріне нұсқаулар, сондай-ақ қазақ тіліндегі техникалық ерекшелікті орналастырмау және т. б. болып қала береді.
Мемлекеттік сатып алу туралы заңнама нормаларының бұзылуына жол бермеу мақсатында бюджеттік бағдарламалар әкімшілерінің, жергілікті атқарушы органдардың, ведомстволық бағынысты ұйымдардың мемлекеттік сатып алу мамандарын уақытылы оқыту және таныстыру бойынша жұмысты күшейтуді бірыңғай ұйымдастырушыға «Қарағанды облысының мемлекеттік сатып алу басқармасы» ММ-сіне хат жолданды.