Венада активтерді қайтару бойынша жұмыс кездесуі өтті

Ағымдағы жылдың 8 – 10 қаңтар аралығында Ақшаны жылыстатуға қарсы күрестің қаржылық шараларын әзірлеу тобы (бұдан әрі - ФАТФ) хатшылығының және Біріккен Ұлттар Ұйымының Есірткі және қылмыс жөніндегі басқармасының (бұдан әрі - БҰҰ ЕҚБ) шақыруымен Активтерді қайтару жөніндегі комитеттің өкілі Вена қаласында (Аустрия) сараптамалық жұмыс кездесуіне қатысты.

Бұл іс-шара активтерді қайтару жөніндегі жаһандық желіде тұратын 20-дан астам елден және халықаралық ұйымдардан құралған сарапшылар тобын біріктірді.

ФАТФ Президенті Эльза де Анда Мадразо мен Біріккен Ұлттар Ұйымы Бөлімшесінің Бас директоры Гада Вали сөз сөйледі.

Кездесу барысында активтерді қайтаруға қатысты ұсыныстар, ақшаны жылыстатуға және терроризмді қаржыландыруға қарсы күресте жаңа стандарттарды енгізу мәселелері талқыланды.

Сонымен қатар, сарапшылар өздерінің инновациялық құралдары мен кейс-зерттеулерімен бөлісті.

Кездесу барысында Комитет өкілі «Заңсыз иемденілген активтерді мемлекетке қайтару туралы» Заңның негізгі ережелерін, ведомство қызметінің бағыттары мен жұмыс нәтижелерін атап өтті.

Отырыс барысында АҚШ, Ұлыбритания, Германия, Сингапур, Қытай, Гонконг, Жапония, Жаңа Зеландия, Греция, Үндістан, Кайман аралдары, Индонезия, Сауд Арабиясы, Әзірбайжан, Түркия, Америка аралық Даму Банкі (IADB), Еуропол, Интерпол, сондай-ақ ФАТФ секілді «GIABA» және «ESAAMLG» топтарының өкілдерімен екіжақты кездесулер өткізілді.

Тараптар активтерді қайтару саласындағы халықаралық ынтымақтастықты нығайту үшін күш біріктіруге ниет білдірді.

Іс-шара нәтижелері бойынша ағымдағы жылдың ақпан айында ФАТФ-тың жалпы отырысында үздік халықаралық тәжірибелерді бекіту туралы шешім қабылданды.