Сенат спикерінің шетелдік конституциялық соттардың судьяларымен кездесуі

Сенат Спикері Мәулен Әшімбаев «Конституциялық Сот төрелігі: баршаға қадір-қасиет, бостандық пен әділдік» атты халықаралық конференцияға қатысу үшін елімізге келген Түркия, Өзбекстан, Қырғызстан, Ангола, Грузия, Египет және Молдова конституциялық соттарының басшыларымен кездесті.

Іс-шараға Қазақстан Республикасы Конституциялық Сотының Төрағасы Эльвира Азимова, Сенат басшылығы мен депутаттары да қатысты.

Палата Төрағасы кездесуге қатысушыларға аталған Конференция аясында сындарлы пікір айтып, тәжірибелерімен бөліскені үшін алғысын білдірді. Сондай-ақ ол Қазақстанда Мемлекет басшысының бастамасымен құрылған Конституциялық Соттың қоғамдағы маңыздылығын атап өтті.

«Конституциялық Сот – азаматтардың құқықтарын қорғайтын маңызды институт қана емес, сонымен бірге заңнаманың ел Конституциясына сәйкестігі тұрғысынан мониторинг жүргізетін тетік. Осы бағытта бірлескен жұмыстың әлеуеті зор. Сондықтан біз Конституциялық Сот пен заң шығарушы орган арасындағы өзара іс-қимыл туралы шетелдік тәжірибелерге үлкен мән беріп отырмыз», – деді Палата Спикері.

Сондай-ақ Мәулен Әшімбаев Сенаттың заң шығару қызметіне тоқталып, Палатаның жұмысы негізінен Мемлекет басшысының халыққа арнаған Жолдауында көрсетілген реформаларды сапалы іске асыруға бағытталғанын айтты.

Кездесу барысында тараптар түрлі елдердің конституциялық сот төрелігі саласындағы негізгі бағыттар мен басымдықтарды да талқылады. Атап айтқанда, судьялар демократияның маңызды элементі ретінде адам құқықтарын қамтамасыз етудің халықаралық тәжірибесіне ерекше назар аударды.