Қазақстан Республикасы Конституциялық Сотының жанындағы Ғылыми-консультативтік кеңес

Қазақстан Республикасы Конституциялық Сотының жанындағы ғылыми-консультативтік кеңес Қазақстан Республикасының Конституциялық Сотына жүктелген өкілеттіктерді жүзеге асыруда оған ғылыми-консультативтік жәрдем көрсету мақсатында құрылған консультативтік-кеңесші орган болып табылады.

 

Ғылыми-консультативтік кеңестің міндеттері:

1) мыналар:

• Конституцияның үстемдігін және оның Республика аумағында тікелей қолданылуын қамтамасыз ету, қазіргі заманғы конституционализм проблемалары;
• Конституциялық Соттың іс жүргізуіндегі мәселелер;
• Конституцияға ресми түсіндірме беруде, алдын ала және кейінгі конституциялық бақылауды жүзеге асыруда шетел тәжірибесін пайдалану;
• конституциялық заңнаманы және оның қолданылу практикасын жетілдіру;
• адам мен азаматтың конституциялық құқықтары мен бостандықтарын қорғау тетіктерінің тиімділігін арттыру;
• Қазақстан Республикасы Конституциясының ережелерін және қазіргі заманғы конституционализм қағидаттарын, конституциялық сәйкестікті және  конституциялық құндылықтарды насихаттау, олардың ережелерінің қолданыстағы заңнамада сақталуы мен нығаюы;
• конституциялық заңдылық мәселелері бойынша азаматтардың құқықтық мәдениетін арттыру жөнінде ғылыми негізделген ұсыныстар мен ұсынымдар дайындау;

2) Конституциялық Соттың еліміздегі конституциялық заңдылықтың жай-күйі туралы жыл сайынғы жолдауының жобасына ұсыныстар енгізу;

3) конституциялық-құқықтық даму мәселелері бойынша Қазақстан Республикасы Президентінің жанындағы Құқықтық саясат жөніндегі кеңеске енгізу үшін Конституциялық Соттың ұсыныстарын тұжырымдауға қатысу;

4) конституциялық бақылауға арналған іс-шараларды өткізуде Конституциялық Сотқа ғылыми-консультативтік және ұйымдастырушылық жәрдем көрсету;

5) Қазақстан Республикасының конституциялық құрылысында ғылыми жетістіктер мен практиканы неғұрлым толық пайдалану үшін отандық және шетелдік ғылыми орталықтармен және құқықтық мекемелермен ынтымақтастықты нығайтуға жәрдем көрсету;

6) конституциялық-құқықтық дамудың өзекті мәселелері жөнінде баяндамалар дайындау және оларды таныстыру.

Ғылыми-консультативтік кеңестің мүшелері өз жұмысын қоғамдық негізде жүзеге асырады.

 

Құрамы

Ғылыми-консультативтік кеңестің құрамына отандық және шетелдік құқықтанушы-ғалымдар кіруі мүмкін. Ғылыми-консультативтік кеңестің құрамын Конституциялық Сот Төрағасының ұсынуы бойынша Конституциялық Сот бекітеді. Конституциялық Соттың судьялары кандидатуралар жөнінде ұсыныс енгізуге құқылы.

Ғылыми-консультативтік кеңестің жұмысына оның мүшелері болып табылмайтын ғылыми және практикалық қызметкерлер тартылуы мүмкін.

Ғылыми-консультативтік кеңестің құрамы әрбір екі жыл сайын бекітіледі.