Су басқан елді мекендерде санитариялық-эпидемиологиялық салауаттылықты қамтамасыз етуді бақылау күшейтілді

Вице-министр А.Есмағамбетованың төрағалығымен Комитет, ҰCО, ҚДСҰО, аумақтық департаменттер мен обаға қарсы станциялар басшылығының қатысуымен су тасқынына қарсы іс-шаралар жөніндегі жедел штаб отырысы өтті.

Отырыс барысында аумақтық санитариялық-эпидемиологиялық бақылау департаменттерінің басшылары баяндама жасады. Олардың ақпараты бойынша су басқан елді мекендердегі санитариялық-эпидемиологиялық ахуалға мониторинг жүргізілуде. Мониторинг көрсеткендей, вакциналарды сақтау қоймалары орналасқан медициналық ұйымдарды су басу жағдайлары тіркелмеген, сақтау шарттары сақталуда.

Баяндамашылардың ақпаратын тыңдап, А. Есмағамбетова халық арасында, БАҚ және әлеуметтік желілерде ақпараттық-түсіндіру жұмыстарын жүргізу керектігін тілге тиек етті. Кеңес қорытындысы бойынша Комитетке және оның аумақтық департаменттеріне осы өңірлерде санитариялық-эпидемиологиялық салауаттылықты қамтамасыз етуді бақылауды күшейтуді, оның ішінде сумен жабдықтау объектілеріне, мал қорымдарына, сібір жарасы қабірлеріне, кәріздерге, зираттарға сапалы мониторинг жүргізуді тапсырды.