Биологиялық қауіпсіздік саласындағы ғылыми зерттеулердің транспаренттілігі және дамуы

Кеше М.Айқымбаев атындағы аса қауіпті инфекциялар ұлттық ғылыми орталығында С.Ж.Асфендияров атындағы Қазақ Ұлттық медицина университетінің Фармация Мектебінің профессор-оқытушылар құрамымен және білім алушыларымен Орталық қызметкерлерінің  экскурсия форматындағы кездесуі өтті.

Бұл кездесудің мақсаты – оқытушыларды, білім алушыларды ғылыми әзірлемелермен, жас зерттеушілердің ғылыми ойлауын қалыптастырудағы интеграцияланған тәсілді дамыту перспективаларымен таныстыру.

Іс-шара еліміздің жетекші зертханаларының бірі – сапа менеджменті, биологиялық және ақпараттық қауіпсіздік жүйесінің халықаралық стандарттарына сай келетін Орталық референттік зертханада өтті.

Орталықтың мамандары қонақтарды заманауи зерттеу технологияларымен таныстырды, оқу сыныбында БҚД-3 зертханасындағы жұмыс туралы айтты.  БҚД-2 зертханасында шолу экскурсиясы өткізілді.

Кездесу барысында болашақ түлектер бірлескен зерттеулер жүргізуге қызығушылық танытты, сондай-ақ биологиялық қауіпсіздік мәселелері бойынша білім беру процесіне қатысу мүмкіндіктерін талқылады.