Атырау облысында сумен жабдықтау нысандарынан алынған 405 сынама тексерілді

Бүгінгі күні Атырау облысы халқының орталықтандырылған сапалы ауыз сумен қамтылу көрсеткіші 99,6%, оның ішінде ашық су көзінен 94,1%, жерасты су көздерінен халықтың 5,5% және орталықтандырылмаған сумен жабдықтау көздерін халықтың 0,2%, тасымал су арқылы халықтың 0,1% пайдаланады.

Атырау облысы санитариялық-эпидемиологиялық бақылау департаментінің аумақтық бөлімшелері мониторинг шеңберінде 2022 жылдың 9 айында сумен жабдықтау нысандарынан санитариялық-химиялық көрсеткішке 405 сынама алып, 46 (11,3%) сәйкессіздікті анықтаса,   микробиологиялық зерттеуге 403 сынама алып, 19 (4,7%) сәйкессіздікті анықтап отыр.

 Ауыз судың санитарлық-эпидемиологиялық жағдайы адам денсаулығына маңызды, судың санитарлық-эпидемиологиялық сапасының төмендеуі адам денсаулығына әсер етіп, түрлі жұқпалы аурулардың таралуына әкелуі мүмкін.

Тұрғындарды сумен қамтамасыз етудің негізгі шарты – ауыз судың сапасы мен қауіпсіздігі, яғни микробиологиялық және санитариялық-химиялық көрсеткіштер бойынша санитариялық талаптарға сәйкестігі болып табылады. Ауыз су сапасын бақылау мониторинг жүргізу мен өндірістік бақылау үшін зертханалық зерттеу және сумен жабдықтау объектілерін жоспарлы тексерулер жүргізу арқылы қамтамасыз етіледі.

Анықталған сәйкессіздер бойынша сумен жабдықтау субъектілеріне санитариялық-эпидемияға қарсы және санитариялық-профилактикалық іс-шараларды жүргізу туралы қаулы берілді және жергілікті атқарушы органдарға ақпарат жіберілді.

Санитариялық-профилактикалық шараларды өткізгеннен кейін, қайталама зертханалық зерттеулердің нәтижелері бойынша су сынамалары гигиеналық нормативтерге сәйкес келді.

2022 жылдың 9 айында сумен байланысты жұқпалы аурулар  облыс көлемінде тіркелген жоқ.