Паразитарлық аурулардың алдын алу

Паразитарлық аурулар адамдар арасында көп таралған аурулар түріне жатады және адам өміріне едәуір теріс әсерін тигізеді.

Паразитарлық ауруда ішек жұмысының нашарлауы, дене салмағының төмендеуі, жүйке жүйесі іс-әрекетінің бұзылуы, адам ағзасының ауруларға жалпы төтеп беруінің төмендеуі, жұқпалы және соматикалық ауруларға бейім болуы, бұлшық еттердің ауырсынуы, балалардың дамуының нашарлауы, мүгедектікке шалдығуы, ал асқынған кезде өліммен аяқталуы да мүмкін.

Шымкент қаласында 2022 жылдың 9 айында паразитарлық аурушаңдықтың  кейбіреуі: қышыма, дерматомикоз, тері лейшманиозы, аскаридоз, энтеробиоз түрлерінің жоғары тіркелгені байқалады.

Қышыма ауруынан 131 науқас тіркелді, былтырғы жылдың ұқсас кезеңімен (83 жағдай) салыстырғанда 1,56 есеге өскен, әсіресе 14 жасқа дейінгі балалар арасында (63 жағдай) 35,1% өскен; тері лейшманиозы ауруымен 2 науқас тіркеліп, 1 жағдайға өскен; аскаридоз аурушаңдығымен 102 науқас тіркеліп, 3 жағдайға, оның ішінде 14 жасқа дейінгі балалар арасында (23 жағдай) 2 жағдайға өскен; энтеробиоз ауруымен 117 науқас тіркеліп, 12,07 % өскен, оның ішінде 14 жасқа дейінгі балалар арасында (96 жағдай) 9,7% өскен. Дерматомикозбен 970 адам науқастанып, аурушаңдық 12,59 % өскен, оның ішінде 14 жасқа дейінгі балалар арасында 8,35% жоғарылаған.

Сонымен қатар, өткен жылмен салыстырғанда эхинококкоз, лямблиоз, педикулез жағдайлары төмендеген.

Паразитарлық аурулар биологиялық материалды (нәжіс, қан, несеп т.б) зертханалық зерттеу мен УДЗ арқылы анықталады.

Паразитарлық аурулардың алдын алу жолдары:

- жеке бас гигиенасын сақтап, қолды сабындап жиі жуу және жеке іш киімдердің тазалығын қатаң сақтау;

- көкөніс, көкшөп, жемістерді сүзгіні қолдана отырып 5 минуттай ағынды таза сумен мұқият жуып пайдалану;

- ет комбинаттарында, базарларда, мал сою пункттерінде ет және ет өнімдеріне ветеринариялық-санитариялық сараптама жүргізу;

- иттерді (күзет, қызметтік және жекеменшік) жоспарға сай жылына кемінде 4 рет дегельминтизация жүргізіп, паспорттау;

- қаңғыбас иттерді жою;

- мал сойғанда итке малдың құртпен зақымданған мүшелерін бермеу;

- үйде итті байлап ұстау және ит тұрған жерді жиі тазарту қажет.