Қазақстанда туберкулезбен ауыру 4,6 есеге төмендеді

             Дүниежүзілік денсаулық сақтау ұйымының бағалауы бойынша әлемде шамамен 10 млн адам туберкулезбен ауырады, ал жылына одан 1,2 млн-нан астам пациент қайтыс болады.

             Инфекция әлі күнге дейін өлімнің негізгі 10 себептерінің бірі және инфекцияның кез-келген қоздырғышынан (АИТВ/ЖИТС-тен бұрын) болатын өлімнің негізгі себебі болып табылады.

             ДДҰ ұсынымы бойынша туберкулездің таралуы жоғары елдерде БЦЖ вакцинациясы туғаннан кейін мүмкіндігінше ерте жүргізіледі.

             БЦЖ вакцинасы (Кальметт-Герен бацилласы) - әлсіреген вакциналық штамм, ол туберкулез ауруын тудырмайды, бірақ осы ауруға қарсы иммунитетті дамытуға мүмкіндік береді.

             Бекітілген Ұлттық егу күнтізбесіне сәйкес елде туберкулезге қарсы иммундау екі рет жүзеге асырылады. Бірінші вакцина – перзентханада сау бала туылғаннан кейін 2-4-тәулікте. Ал ревакцинация бірінші сыныпта, қыркүйекте жүргізіледі. Бұл жағдайда балаларда теріс Манту реакциясы болуы керек.

             Жыл сайын республикада туберкулезге қарсы 6-7 жастағы 169 мыңнан астам бала қайта вакцинацияланады.

             Соңғы 20 жылда туберкулезбен ауыру 4,6 есеге азайды (2001 жылғы 147,1-ден 2021 жылғы 100 мың тұрғынға шаққанда 31,4-ке дейін).

             Туберкулезге қарсы вакцинация балалар арасында туберкулездің ауыр жағдайлары - туберкулезді менингит және диссеминацияланған туберкулездің дамуына жол бермеуге мүмкіндік берді.

             Бұл деректер балаларды вакцинациялауды қоса алғанда, туберкулез бойынша эпидемиологиялық жағдайды тұрақтандыру бойынша жүргізілетін шаралардың тиімділігін растайды. Айта кету керек, кез-келген профилактикалық егу тек ата-аналардың немесе кәмелетке толмағандардың басқа да заңды өкілдерінің ақпараттандырылған келісімімен жүзеге асырылады. Келісім немесе бас тарту жазбаша түрде ресімделеді.