Түркістан облысының 1491 тұрғыны Pfizer вакцинасын алды

             Түркістан облысында коронавирус инфекциясына қарсы «Комирнати» екпесін салу жұмыстары 15-ші қарашадан басталып, нәтижесінде жастары 12-17  аралығындағы 973  жасөспірім, 365 жүкті, 153  лактация кезеңіндегі аналар екпемен қамтылды.                        

            Өңір эпидемиологтары  тиімділігі 95%  көрсеткен «Комирнати» вакцинасы  оқушылар  мен жүкті әйелдер арасындағы аурушаңдықты тұрақтандырып, ұжымдық иммунитеттің қалыптасуына септігін тигізетіндігіне  сенімді.              

            Түрлі мутацияларға ұшыраған Covid-19 инфекциясы кез келген жастағы адамдарға қауіпті. Жыл басынан бері облыста 14- жасқа дейінгі  2 233 бала, оның ішінде жаңа оқу жылы басталғалы 395 оқушы  коронавируспен ауырып, 206 сыныпқа карантин жарияланды.             

            Мамандардың айтуынша эпидемиологиялық тексеру кездерінде белгілі болғандай, балалардың көбісі Covid-19 инфекциясын науқас ата-аналарымен және білім мекемелерінде  байланыста болғанда жұқтырған.                          

            Сондықтан ересектердің ғана емес,  жасөспірімдердің де коронавирусқа  қарсы иммунитетін көтеру маңызды.  Түркістан облысында  жалпы  вакцинациялануға жоспарланған (1 031 870) халықтың 1 009 314-і, яғни  96,2%  вакцинаның І-ші компонетімен қамтылған. 

            Айтып өтейік, ДДҰ 12-17 жас аралығындағы жасөспірімдерді «Комирнати» вакцинасымен егілуді ұсынады. Бүгінгі таңда Pfizer вакцинасын Израиль, Франция, Италия, Испания, Германия, Бразилия, Қытай, Швеция, Ұлыбритания, АҚШ, Аргентина және т.б. көптеген дамыған елдерде  балаларды КВИ-ге қарсы вакцинациялауда қолдануда.