Карантин кезінде балаларды сауықтыру лагерлері қалай жұмыс істейді
Бас мемлекеттік санитариялық дәрігердің 2021 жылғы 26 мамырдағы № 24 Қаулысымен Қазақстанда балаларды сауықтыру лагерьлерінің (мектеп жанындағы, қала сыртындағы) шектеу іс-шаралары, оның ішінде карантин кезіндегі қызмет алгоритмі бекітілді.
Биыл еліміздің Бас мемлекеттік санитарлық дәрігерінің 2021 жылғы 30 сәуірдегі № 17 қаулысына сәйкес республика аумағында балаларды сауықтыру лагерлерінің қызметіне рұқсат берілді.
Балаларды сауықтыру лагерлерінің қызметі әлеуметтік-экономикалық объектілердің жұмысын шектеу критерийлерімен айқындалған. «Жасыл» аймақтағы өлшемдерге сәйкес жазғы лагерьлер шектеусіз, «сары» айматағы лагерьлер 50%, «қызыл» аймақтағы 30% жүктемемен жұмыс істейді.
Мұнымен қоса, Бас мемлекеттік санитариялық дәрігердің 26 мамырдағы қаулысына сәйкес балаларды сауықтыру лагерлерінің (мектеп жанындағы, қала сыртындағы) шектеу іс-шаралары, оның ішінде карантин кезіндегі қызмет алгоритмі бекітілді.
Бұл алгоритм стационарлық демалыс және сауықтыру ұйымдарының персоналына жұмыс басталғанға дейін 72 сағат бұрын жасалған ПТР зерттеудің теріс нәтижесін немесе қызметкердің COVID-19-ға қарсы вакцинациялаудың толық курсын алғанын растайтын құжатты ұсыну кезінде жұмыс орнына кіруіне рұқсат беруді көздейді.
Әрбір бала лагерьге келу кезінде денсаулық жағдайы туралы құжаттарды (сауықтыру лагеріне баратын оқушыға арналған 079/у үлгісіндегі медициналық анықтама), инфекциялық ауруларға, оның ішінде коронавирустық инфекцияға шалдыққан науқастармен байланыстың жоқтығын растайтын анықтамаларды, лагерьге келгенге дейін 72 сағат бұрын жүргізілген ПТР зерттеудің теріс нәтижесі бар құжатты ұсынуы шарт.
Сауықтыру ұйымдарының барлығы ҚР Денсаулық сақтау министрінің 2018 жылғы 3 сәуірдегі №146 бұйрығымен бекітілген санитарлық ережелердің талаптарына сәйкес келуі қажет.
Дәлірек айтқанда, балалар лагерьлері (жыл бойы жұмыс істейтін ұйымдарды қоспағанда) сауықтыру маусымы басталғанға дейін объектінің халықтың санитариялық-эпидемиологиялық саламаттылығы саласындағы нормативтік құқықтық актілерге сәйкестігі туралы санитариялық-эпидемиологиялық қорытындыны алуға міндетті.
Жыл бойы жұмыс істейтін сауықтыру ұйымдары санитариялық-эпидемиологиялық қорытындыны нысанды пайдалану мерзімі басталғанға дейін бір рет алады.
31 мамырдағы жағдай бойынша елімізде Алматы, Павлодар, Түркістан, Ақтөбе және Қызылорда облыстарындағы 12 сауықтыру ұйымы санитариялық қағидалар мен гигиеналық нормативтердің талаптарына сәйкестігі туралы санитариялық-эпидемиологиялық қорытындыны алды.