Комитет төрағасы Еңбек гигиенасы және кәсіптік аурулар ұлттық орталығының қызметімен танысты

Қарағанды облысына жұмыс сапары аясында Комитет төрағасы Сархат Бейсенова Еңбек гигиенасы және кәсіптік аурулар ұлттық орталығына барды.

Сапар барысында ол Орталықтың заманауи ғылыми және клиникалық мүмкіндіктерімен танысты. Атап айтқанда, терапевтік және неврологиялық бөлімдерге, клиникалық-диагностикалық бөлімшеге, кәсіби патология зертханасына, сондай-ақ ғылыми-зерттеу және санитариялық-гигиеналық зертханаларға барды. Мұнда С. Бейсеноваға құрылымдық бөлімшелердің әдістемелік, ғылыми және материалдық-техникалық базасы, соның ішінде инновациялық диагностикалық және талдау әдістері таныстырылды.

Орталық мамандары қазіргі гигиеналық факторлардың жұмыс істейтін халықтың денсаулығына әсерін бағалауға арналған зерттеулерін ұсынды. Олардың қатарында — 5G стандартындағы сымсыз байланыс электромагниттік әсерлері, жаңартылатын энергия көздерін (жел және күн) пайдалануымен байланысты факторлардың ықпалы, сондай-ақ талшықты бөлшектердің жұмысшылар мен тұрғындар денсаулығына әсері бар.

Сапар қорытындысы бойынша Сархат Бейсенова мазмұнды экскурсия үшін Орталық қызметкерлеріне алғысын білдіріп, жүргізіліп жатқан зерттеулердің маңыздылығын атап өтті. Оның айтуынша, ұсынылған әзірлемелер мен жобалар — болашақ ғылыми жетістіктердің бастамасы ғана, ал олардың маңызы әрі қарай арта бермек.