Қазақстан Республикасы Денсаулық сақтау министрінің 2022 жылғы 11 қаңтардағы № ҚР ДСМ-2 бұйрығымен жаңа «Адамның өмір сүру ортасы мен денсаулығына әсер ету объектілері болып табылатын объектілердің санитариялық-қорғаныш аймақтарына қойылатын санитариялық-эпидемиологиялық талаптар» санитариялық қағидалары бекітілді, бұйрық алғаш ресми жарияланған күнінен кейін күнтізбелік он күн өткен соң, яғни 2022 жылғы 24 қаңтардан бастап қолданысқа енгізілді.
Осы күннен бастап «Өндірістік объектілердің санитариялық-қорғаныш аймағын белгілеу бойынша санитариялық-эпидемиологиялық талаптар» санитариялық қағидаларын бекіту туралы» Қазақстан Республикасы Ұлттық экономика министрінің 2015 жылғы 20 наурыздағы № 237 бұйрығының күші жойылды.
Жаңа санитариялық қағидалар:
1) СҚА және санитариялық ажырауларды белгілеуге қойылатын;
2) СҚА және санитариялық ажырауларды жобалауға қойылатын;
3) СҚА және санитариялық ажырауларды көгалдандыруға және аумақтың режиміне қойылатын санитариялық-эпидемиологиялық талаптарды қамтиды.
Сонымен қатар, халықтың қауіпсіздігін қамтамасыз ету мақсатында адамның өмір сүру ортасы мен денсаулығына әсер ету көздері болып табылатын объектілердің (көздердің) айналасында СҚА белгіленеді, оның өлшемі ластанудың атмосфералық ауаға әсерін (химиялық, биологиялық, физикалық) гигиеналық нормативтерде азайтуды қамтамасыз етеді.
Бұдан басқа, бизнес қоғамдастықты қолдау мақсатында жаңа санитариялық қағидаларда өнім өндіру көлеміне қарай қуаты аз объектілерге санитариялық-қорғаныш аймағын белгілеу бойынша сараланған тәсіл көзделген және қайталанатын және өзге де талаптар алып тасталды.