Дүниежүзілік денсаулық сақтау ұйымы мен Ауруларды бақылау және профилактикасы орталығының (CDC) деректері бойынша қазіргі уақытта әлемнің әртүрлі өңірлерінде қызылшаның таралу қаупі бар, себебі COVID-19 қызылшаға қарсы вакцинациямен қамтудың және ауруды эпидемиялық бақылаудың төмендеуіне алып келді.
Соңғы жылы әлемнің 150 елінде өлім-жітім жағдайын қоса алғанда, қызылшаның 155,5 мың жағдайы тіркелді.
2023 жылдың басында қызылша бойынша эпидемиологиялық жағдайдың күрделенуі жақын шет елдерде де (Украина, Қырғызстан, Ресей Федерациясы және т.б.) байқалады.
Қазіргі уақытта Қазақстанда қызылшаға күдіктенудің 62 жағдайы тіркелді, оның ішінде зертханалық расталғаны – 26 жағдай. Бұл ретте, 26 жағдайдың жетеуі (26,9%) басқа елдерден (Түркия – 5, Қырғызстан – 1, Тәжікстан – 1) әкелінген.
Қазақстан Республикасының халқы арасында қызылшамен сырқаттанушылықтың өсуіне және таралуына, өршуінің туындауына жол бермеу мақсатында, сондай-ақ ағымдағы жылы қызылшамен сырқаттанушылық бойынша қолайсыз эпидемиологиялық жағдайды ескере отырып, Қазақстан Республикасында қызылша жөніндегі санитариялық-эпидемияға қарсы және санитариялық-профилактикалық іс-шараларды ұйымдастыру және жүргізу туралы қаулы шығарылды (https://www.gov.kz/memleket/entities/kkkbtu/documents/details/442411?lang=kk).
Қаулыға сәйкес:
1) қызылшаның әрбір жағдайын эпидемиологиялық тергеп-тексеруді және инфекция ошақтарының шекараларын белгілеу, олардың инфекция көзін, қызылшаға қарсы алынған профилактикалық екпелер туралы мәліметтерді белгілей отырып, байланыста болған адамдарды анықтау мақсатында эпидемиологиялық зерттеп-тексеру;
2) қызылшаға зертханалық зерттеу;
3) шетелдік азаматтарды қоса алғанда ақпараттандырылған келісімді алғаннан кейін қызылшамен ауыратын науқаспен соңғы байланыста болған сәттен бастап 72 сағаттан кешіктірмей байланыста болған 30 жасқа дейінгі адамдарға шұғыл вакцинация жүргізу;
4) аурудың соңғы жағдайы анықталған сәтінен бастап 21 тәуліктің ішінде байланыста болған адамдарды күнделікті медициналық бақылау;
5) ақпараттандырылған келісімді алғаннан кейін бұрын қызылшаға қарсы егілмеген 55 жасқа дейінгі медицина қызметкерлерін вакцинациялау жүзеге асырылады.