Көші-қон комитеті қазақстандықтарды шетелде жұмыс іздеу кезінде интернет-алаяқтардан сақ болуға шақырады
Әлеуметтік желілер мен мессенджерлерде елден тыс жерлерде жылдам жұмысқа орналасу туралы қызықты жарнамалардың таралуы жиілеп кетті. Қазақстан Республикасы Еңбек және халықты әлеуметтік қорғау министрлігінің Көші-қон комитеті ресми ЕСКЕРТЕДІ: мұндай ұсыныстардың көпшілігі Қазақстанда ресми тіркелмеген және құқықтық өрістен тыс әрекет ететін шетелдік делдалдар мен күмәнді ұйымдардан келеді.
Тексерілмеген интернет-ресурстар арқылы оңай ақша табуға ұмтылу көбінесе сенімді азаматтар үшін ауыр зардаптарға айналады. Отандастар үлкен қаржылық шығындарға, құқықтық кепілдіктердің толық болмауына және шетелде үлкен қиындықтарға тап болу қаупі бар. Мұндай схемаларды ұйымдастырушылар көбінесе республикадан тыс жерлерде болады, бұл зардап шеккендердің құқықтарын қорғауды өте қиын етеді.
Көші-қон комитеті азаматтарды қырағы болуға, әлеуметтік желілердегі кездейсоқ хабарландыруларға сенбеуге және күмәнді жалдаушыларға ақша аудармауға шақырады. Шетелде қауіпсіз жұмысқа орналасу барлық құжаттар мен рұқсаттарды міндетті түрде алдын ала тексере отырып, ресми, аккредиттелген операторлар арқылы ғана мүмкін болады.
Көші-қон саласындағы бірқатар қызметті migration.enbek.kz көші-қон процестері порталы арқылы онлайн алуға болады. Портал Қазақстан азаматтары, этникалық қазақтар, шетел азаматтары, жұмыс берушілер мен инвесторларға арналған қызметтерді бір платформада ұсынады.
Бұл жерде «қандас» мәртебесін алу, қандастарды қабылдаудың өңірлік квотасына енгізу, еңбек иммигранттарына жұмыс істеуге рұқсат рәсімдеу, шетелдік жұмыс күшін тарту және тағы басқа да қызметтер қолжетімді.
Порталдың басты артықшылығы барлық негізгі рәсімдерді онлайн орындауға болады: тіркеліп, жеке деректерді толтыруға, өтініш беруге және оның мәртебесін жеке кабинеттен бақылауға мүмкіндік бар.
Тіркелу – қызмет алудың алғашқы қадамы
Алдымен migration.enbek.kz сайтына кіріп, «Кіру» батырмасында «Тіркелу» қажет.
Ол үшін электрондық поштасын және құпиясөзін енгізіп, пайдаланушы келісімінің шарттарын қабылдау және есептік жазба ашу керек. Одан кейін көрсетілген электрондық поштаға тіркелуді растау туралы хат келеді.
Порталда пайдаланушылардың бірнеше санаты қарастырылған. Сондықтан қолжетімді қызметтер мен қажетті мәліметтер пайдаланушы таңдаған санатқа байланысты болады.
Жеке кабинет: қажетті ақпараттардың барлығы бір жерде
Порталға кіргеннен кейін пайдаланушы жеке кабинетке өтеді. Қызмет алмас бұрын «Жеке деректер» бөлімін толтыру қажет.
Егер шетел азаматының ЖСН-і болса, ол туралы кейбір мәлімет мемлекеттік ақпараттық жүйелерден автоматты түрде алынуы мүмкін. Қалған қажетті деректерді пайдаланушы өзі енгізеді. Мәліметтерді сақтамас бұрын олардың дұрыстығын мұқият тексеру керек.
Жеке мәліметтерді енгізген соң, пайдаланушы өзіне қажетті қызметті таңдап, электрондық өтініш формасын толтырып, оны қарауға жолдай алады.
Жеке кабинетте өтініштің мәртебесін бақылап, тиісті хабарламаларды алуға болады. Бұл қызметтің қалай көрсетіліп жатқанын қосымша сұрау салмай-ақ қадағалауға мүмкіндік береді.
Өтініш жібермес бұрын деректер мен құжаттарды тексеріңіз
Өтінішті жіберер алдында енгізілген мәліметтердің дұрыстығын тексеру маңызды.
Жеке мәліметтердің сәйкестігіне, міндетті бөлімдердің толықтығына және қажетті құжаттардың енгізілгеніне көз жеткізу керек.
Жүйе міндетті ұяшықтың толтырылуын да тексереді. Қажетті мәліметтер толық енгізілмеген жағдайда, пайдаланушыға ескерту көрсетіліп, деректерді толықтырмай тұрып сақтауға мүмкіндік берілмейді.
Әр қызметтің талаптары мен қажетті құжаттар тізімі әртүрлі. Сондықтан өтініш бермес бұрын таңдалған қызметтің сипаттамасы мен оны алу шарттарымен танысу ұсынылады.
Хабарламаларды тексеріп отырыңыз
Өтініш жіберілген соң оның қаралу кезеңдеріне қатысты ақпарат жеке кабинетте қолжетімді болады. Сондықтан пайдаланушы өтініш мәртебесін үнемі қадағалап, жүйедегі хабарламалармен танысып отыруы қажет. Бұл рәсімдеу барысындағы өзгерістерді дер кезінде біліп, қажет болған жағдайда қосымша әрекеттерді орындауға көмектеседі.
Сонымен қатар порталда қолжетімді қызметтер туралы, көші-қон және жұмысқа орналасу саласындағы ресми дереккөздерден алынған ақпараттар жарияланып отырады.
Migration.enbek.kz – көші-қон саласындағы қызметтерді алуға арналған бірыңғай цифрлық портал. Оның көмегімен тіркелу және жеке деректерді толтырудан бастап, өтініш беріп, нәтижесін бақылауға дейінгі негізгі кезеңдерден онлайн өтуге болады.
Қазақстанда көші-қон саласындағы бағалау тәсілдерін жетілдіру үшін тестілеудің заманауи цифрлық форматы енгізіліп жатыр. Бұл қатысушыларға тестілеуден қашықтан өтуге, уақытты үнемдеуге және процедураны ыңғайлы әрі ашық ұйымдастыруға мүмкіндік береді.
Онлайн тестілеудің бір бөлігі – прокторинг. Бұл – тест тапсырып отырған адамның жеке басын растауға және тестілеу кезінде белгіленген талаптардың сақталуын бақылауға арналған техникалық және ұйымдастырушылық шаралар.
Прокторингтің негізгі мақсаты тест нәтижесінің шынайылығын қамтамасыз ету және барлық қатысушыға бірдей жағдай жасау. Жүйе тестілеуді тіркелген адамның өзі өтіп жатқанын растап, белгіленген талаптардың сақталуын бақылауға мүмкіндік береді.
Тестілеу басталмас бұрын қатысушының жеке басы анықталады. Бұл адамның тіркелу кезінде көрсеткен деректерін тексеріп, тест тапсырып отырған адамның кім екенін растау үшін қажет. Осылайша тест нәтижесінің нақты қатысушыға тиесілі екені анықталады.
Тестілеу кезінде бейнебақылау жүргізілуі мүмкін. Оның мақсаты қатысушының сыртқы келбетін немесе жеке қасиеттерін бағалау емес. Бейнебақылау тек тестілеу кезінде белгіленген талаптардың сақталуын бақылау үшін қолданылады.
Тестілеу барысын бейнежазбаға түсіру де – процедураның ашықтығын қамтамасыз ететін құралдардың бірі. Қажет болған жағдайда бейнежазба арқылы тестілеудің белгіленген тәртіппен өткенін тексеруге болады.
Осылайша, жеке басты сәйкестендіру, бейнебақылау және бағалау барысын тіркеу барлық қатысушыға бірдей және ашық жағдай жасауға бағытталған. Бұл әр қатысушының өз білімі мен дағдысын әділ көрсетуіне мүмкіндік береді.
Маңыздысы прокторинг тест кезінде жиналған баллға әсер етпейді және қорытынды бағаны анықтамайды. Оның міндеті тестілеудің белгіленген тәртіппен өтуін әрі талаптардың сақталуын бақылау.
Цифрлық форматтың тағы бір артықшылығы тестілеуді қашықтан, қосымша жол жүрмей-ақ тапсыруға болады. Бұл қатысушының уақытын үнемдеп, тестілеуге байланысты ұйымдастыру жұмыстарын жеңілдетеді.
Цифрлық құралдарды қолдану бағалау процесін ыңғайлы және ашық өткізуге жағдай жасайды. Барлық қатысушы үшін ортақ талаптардың сақталуы бағалау нәтижелерінің әділ әрі объективті болуына ықпал етеді.
Қандас мәртебесін алуды немесе Қазақстанда тұрақты тұруға рұқсат рәсімдеуді жоспарлаған азаматтар үшін ҚАЗТЕСТ тапсыру – көші-қон әлеуетін критериалды бағалау кезеңдерінің бірі. Тестілеу арқылы адамның мемлекеттік тілді білу деңгейі анықталады.
Ең алдымен, ҚАЗТЕСТ қазақ тілін терең білуді талап ететін күрделі емтихан емес екенін атап өткен жөн. Тестілеу түсінікті әрі қолжетімді форматта өтеді. Тапсырмалар адамның күнделікті өмірде қарым-қатынас жасауына және Қазақстандағы жаңа ортаға бейімделуіне қажетті мемлекеттік тілді қаншалықты түсінетінін анықтауға бағытталған.
Сұрақтар күнделікті өмірде кездесетін жағдайларға негізделген. Басты назар адамның қазақ тіліндегі сөздерді тыңдап түсінуіне және оқыған ақпаратты қабылдауына аударылады. Тест тапсырмалары барынша жеңіл құрастырылған.
Қатысушы екі бағыт бойынша тыңдалым және оқылымнан барлығы 60 тапсырманы орындайды. Тестілеуге 1 сағат 10 минут беріледі және ол онлайн форматта тапсырылады.
Тест форматына алдын ала танысып, дайындалғысы келетіндер үшін бейімдеу және интеграция орталықтарында тегін дайындық қарастырылған. Мұнда қажетті кеңес алуға, ҚАЗТЕСТ форматы туралы ақпарат алуға және жаттығу тапсырмаларын орындауға болады. Бұл қатысушыға тест құрылымын алдын ала түсініп, дайындалуға көмектеседі.
Қажетті нәтиже көрсете алмаған жағдайда тестілеуді қайта тапсыруға мүмкіндік бар. Соңғы тестілеуден кейінгі 30 күнтізбелік күн ішінде екі ретке дейін қайта тапсыруға болады.
Тестілеу прокторинг жүйесі арқылы жүргізіледі. Сондықтан тестті бастамас бұрын камера мен микрофонның дұрыс жұмыс істеп тұрғанын, сондай-ақ интернет байланысының тұрақты екенін тексеріп алған жөн.
Тест нәтижесі үш жұмыс күні ішінде беріледі.
ҚАЗТЕСТ – көші-қон әлеуетін критериалды бағалаудың жалпы рәсіміндегі кезеңдердің бірі. Оның негізгі мақсаты адамның мемлекеттік тілді күнделікті өмірде қолдану деңгейін және қазақ тілінде қарапайым қарым-қатынас жасауға дайындығын анықтау.
Сондықтан болашақ қатысушылар үшін негізгі ақпарат мынадай: тестілеу онлайн форматта өтеді, тапсырмалар қазақ тілін күнделікті өмірде қолдануға қажетті дағдыларды бағалауға бағытталған, оған тегін дайындалуға болады, ал қажет болған жағдайда қайта тапсыруға мүмкіндік бар.
ҚАЗТЕСТ тапсыру тәртібі туралы қосымша ақпаратты Testcenter.kz және migration.enbek.gov.kz ресми ресурстарынан алуға болады.
Ерікті түрде қоныс аудару мүмкіндігін қарастырып жүрген Қазақстан азаматтары migration.enbek.kz порталындағы интерактивті картаны пайдалана алады. Жаңа цифрлық сервис ыңғайлы форматта қоныстандыру өңірлері, қоныс аудару шарттары, жұмысқа орналасу мүмкіндіктері және мемлекеттік қолдау шаралары туралы өзекті ақпаратпен танысуға мүмкіндік береді.
Интерактивті карта азаматтарға көшу жағдайларын алдын ала бағалап, өңірді таңдау туралы негізделген шешім қабылдауға көмектесу мақсатында әзірленген. Пайдаланушы қызығушылық танытқан өңірді таңдап, бос жұмыс орындары, сұранысқа ие мамандықтар, қоныс аударушыларды қабылдайтын елді мекендер, сондай-ақ ұсынылатын мемлекеттік қолдау шаралары туралы ақпарат ала алады.
Картаның негізгі бөлімдерінің бірі – сұранысқа ие мамандықтар туралы ақпарат. Өңірлік еңбек нарығының қажеттіліктерімен алдын ала танысу әлеуетті қатысушыларға қоныс аударғанға дейін жұмысқа орналасу перспективаларын бағалауға және өз мамандығы, тәжірибесі мен кәсіби дағдыларын ескере отырып, өңірді таңдауға мүмкіндік береді.
Қоныстандыру өңірлерінде экономиканың түрлі салаларының мамандарына сұраныс бар. Атап айтқанда, мынадай мамандарға қажеттілік сақталуда:
Бұл ретте сұранысқа ие мамандықтар тізбесі өңірлік еңбек нарықтарының ағымдағы қажеттіліктерін ескере отырып, тұрақты түрде жаңартылып отырады. Бұл пайдаланушыларға нақты өңірде жұмысқа орналасу мүмкіндігі бар бағыттар бойынша неғұрлым өзекті ақпарат алуға мүмкіндік береді.
Бос жұмыс орындары мен мамандықтар туралы ақпараттан бөлек, интерактивті картада қоныс аударушыларды қабылдайтын елді мекендер, әлеуметтік инфрақұрылым нысандары, қолжетімді мемлекеттік қолдау шаралары және консультация алу үшін байланыс деректері туралы мәліметтер қамтылған. Осылайша, азаматтар тек жұмысқа орналасу перспективаларын ғана емес, таңдалған елді мекендегі өмір сүру жағдайларын да бағалай алады.
Барлық қажетті ақпараттың бір цифрлық сервисте жинақталуы көшуге дайындық процесін түсінікті, ашық әрі ыңғайлы етеді. Пайдаланушыға бос жұмыс орындары, инфрақұрылым және қолдау шаралары туралы мәліметтерді әртүрлі дереккөздерден өз бетінше іздеудің қажеті жоқ – негізгі ақпарат тікелей картада қолжетімді.
migration.enbek.kz порталындағы осындай цифрлық сервистерді дамыту ерікті түрде қоныс аудару мүмкіндіктері туралы ақпараттың қолжетімділігін арттыруға, азаматтарға көшу процесін алдын ала жоспарлауға және кәсіби әрі өмірлік қажеттіліктерін ескере отырып, негізделген шешім қабылдауға мүмкіндік береді.
Барлық қызығушылық танытқан азаматтарды migration.enbek.kz порталындағы қоныс аударудың интерактивті картасын пайдалануға, қоныстандыру өңірлеріндегі жұмысқа орналасу мүмкіндіктерімен, сұранысқа ие мамандықтармен және тұру жағдайларымен танысуға, сондай-ақ одан әрі тұру және еңбек қызметін жүзеге асыру үшін өзіне неғұрлым қолайлы өңірді таңдауға шақырамыз.
Мемлекет басшысының Жарлығымен Асқарбек Маратұлы Ертаев Қазақстан Республикасының Еңбек және халықты әлеуметтік қорғау министрі лауазымына тағайындалды.
3 қыркүйекте Көші-қон комитеті мен Халықаралық көші-қон ұйымы (ХКҰ) өкілдерінің Алматы процесінің жоғары лауазымды тұлғаларының 12-ші кездесуін ұйымдастыруға дайындық мәселелеріне арналған алдын ала кездесуі өтті.
Кездесу барысында тараптар алдағы іс-шараның форматы мен бағдарламасына, қатысушылар құрамына, ұйымдастырушылық өзара іс-қимылға, сондай-ақ оны өткізуге байланысты логистикалық мәселелерге қатысты негізгі мәселелерді талқылады.
Сонымен қатар, Алматы процесі аясында бұған дейін өткізілген кездесулердің тәжірибесі мен қорытындыларын ескеру, сондай-ақ алдағы іс-шараны дайындау шеңберіндегі одан әрі өзара іс-қимыл мәселелеріне ерекше назар аударылды.
Кездесу қорытындысы бойынша тараптар Алматы процесінің жоғары лауазымды тұлғаларының 12-ші кездесуін сапалы ұйымдастыру мақсатында бірлескен жұмысты жалғастыруға және ұйымдастырушылық мәселелерді одан әрі келісуге уағдаласты.
Қазақстан Республикасы еңбек және халықты әлеуметтік қорғау министрінің бұйрығымен Дінмұхамед Гайдарұлы Қылышпаев ведомствоның Көші-қон комитетінің төрағасы қызметіне тағайындалды.
Қазақ гуманитарлық-заң университетін заңгер мамандығы бойынша бітірген, сондай-ақ академик А. Қуатбеков атындағы Халықтар достығы университетін экономика мамандығы аяқтаған.
Еңбек жолын 2008 жылы «ОҚО ШОБ-ты құқықтық қорғау жөніндегі заңгерлер одағы» қауымдастығының заңгері болып бастады.
2009–2015 жылдары — «Тәуелсіз заңгерлер» қоғамдық бірлестігінің төрағасы.
2015–2017 жылдары — ҚР Денсаулық сақтау және әлеуметтік даму министрлігі Заң қызметі департаменті Құқықтық талдау басқармасының сарапшысы, бас сарапшысы.
2017–2018 жылдары — ҚР Денсаулық сақтау министрлігі Заң қызметі департаментінің Құқықтық сараптама басқармасының басшысы.
2018–2020 жылдары — ҚР Денсаулық сақтау министрлігінің Заң қызметі департаменті директорының орынбасары.
2020–2021 жылдары — ҚР Ұлттық экономика министрлігінің Мемлекеттік басқару жүйесін дамыту департаменті директорының орынбасары.
2021–2022 жылдары — ҚР Парламенті Мәжілісі Аппаратының Экономикалық реформа және өңірлік даму комитетінің қызметін қамтамасыз ету бөлімінің бас консультанты.
2022 жылдың қыркүйегінен бастап қазіргі уақытқа дейін ҚР Ұлттық экономика министрлігінің Мемлекеттік басқару жүйесін дамыту департаментінің директоры қызметін атқарды.
ҚР Еңбек және халықты әлеуметтік қорғау министрлігі еңбек нарығының сұранысы мен елдің әлеуметтік-экономикалық даму басымдықтарын ескере отырып, көші-қон үдерістерін басқару жүйесін жетілдіруге бағытталған Қазақстан Республикасының көші-қон саясатының 2030 жылға дейінгі тұжырымдамасын кезең-кезеңімен іске асыруды жалғастыруда.
Тұжырымдама көші-қон саласындағы мемлекеттік саясатты кешенді түрде дамытуды көздейді. Оның аясында экономиканы қажетті еңбек ресурстарымен қамтамасыз ету, ішкі еңбек нарығын қорғау және сұранысқа ие білікті мамандарды тарту бағытындағы шаралар өзара үйлестіріліп жүзеге асырылуда.
Көші-қон саласын цифрландыру шеңберінде мемлекеттік органдардың ақпараттық жүйелерімен интеграцияланған бірыңғай цифрлық платформаны дамыту жұмыстары жүргізілуде. Бұл ведомствоаралық өзара іс-қимылдың тиімділігін арттыруға, сондай-ақ мемлекеттік қызметтердің сапасы мен қолжетімділігін жақсартуға мүмкіндік береді.
Сұраныстағы мамандық иелері үшін Қазақстанда тұрақты тұруға рұқсат алу тәртібі жетілдірілуде. Сонымен қатар шетелдік жұмыс күшін тарту тетіктері де одан әрі дамытылып, жұмыс берушілердің жауапкершілігі күшейтіліп, қазақстандық мамандардың кәсіби білімі мен тәжірибесін жетілдіру мақсатында тәлімгерлік институты кеңінен қолданылуда.
Ерікті қоныс аудару бағдарламасын жетілдіру жұмыстары кезең-кезеңімен жалғасуда. Бағдарламаға қатысушыларға көрсетілетін мемлекеттік қолдау көлемі кеңейтіліп, экономикалық ұтқырлық сертификатының мөлшері ұлғайтылды, қолдау алушылардың санаты кеңейтілді. Сонымен қатар азаматтарға қоныс аударғанға дейін жұмыс орындарын алдын ала іріктеу тетіктері енгізілуде.
24KZ телеарнасының «Халық таңдауы» бағдарламасының тікелей эфирінде еңбек көші-қоны, шетелдік мамандарды тарту және экономиканы білікті кадрлармен қамтамасыз ету мәселелері талқыланды.
Эфир барысында Қазақстандағы еңбек көші-қон саласындағы мемлекеттік саясаттың негізгі бағыттарына түсіндірме берілді. Елде шетелдік жұмыс күшін тарту тетіктері кезең-кезеңімен жетілдіріліп, рәсімдердің ашықтығын қамтамасыз етуге, ішкі еңбек нарығын қорғауға және жұмыс берушілердің сұранысына сай білікті мамандарды тартуға ерекше назар аударылып отырғаны айтылды.
Сонымен қатар басым салаларға жоғары білікті кадрларды тарту, квоталарды тиімді бөлу және мемлекеттік қызметтерді цифрландыру мәселелері көтерілді. Бұл шаралар жұмыс берушілер мен шетелдік қызметкерлер үшін рұқсат алу рәсімдерін жеңілдетуге мүмкіндік береді.
Еңбек көші-қоны саласындағы тиімді әрі теңгерімді саясат Қазақстанның еңбек нарығын дамытуға және ел экономикасының тұрақты өсуіне ықпал етеді.