Қостанай облысының әкімі Арқалық қаласына келді
Оңтүстік өңірлер үшін серпінді болып табылатын Арқалық қаласында ет өңдейтін кешенді салу инвестициялық жобасын жүзеге асыру практикалық қолданысқа еніп жатыр. Қостанай облысының әкімі Архимед Мухамбетов Арқалыққа жасаған жұмыс сапары барысында жобаны іске қосуға дайындықты тексерді.
Ет өңдейтін кешенді іске қосу барысында шұжық өнімдері мен консерві өнімдерінің сынама өнімдері өндірілді. Облыс әкімі табысты бастамамен құттықтап, мұның бірінші кезең екенін еске салып өтті. Жобаның екінші кезеңінде – келесі жылдың қазан айына дейін үш мың бас ірі қара малға арналған бордақылау алаңын салу жоспарланып отыр. Сонымен қатар, қайта өңдейтін кешен үшін ет дайындаумен айналысатын оңтүстік аудандарда бірнеше сервистік орталықтар құрылатын болады. Олар өнімдерді сақтау үшін тоңазытқыш жабдықтармен жабдықталады.
Осы жобаның мысалында біз Арқалық қаласында толыққанды өндірістік кластер құру келешегі туралы айтуға болады. Бірінші кезеңде оны жүзеге асыруға шамамен 2 млрд теңге инвестицияланды. Олардың ішінде, Арқалық қаласының әкімі Эльдар Кузенбаев атап өткендей, «Тобыл» ӘКК-ның қаржы ресурстарынан 500 миллион теңге тартылды. Сонымен қатар, коммуналдық инфрақұрылымды жүргізуге мемлекеттік қолдау аясында 84 млн теңге тартылды. Жобаны жүзеге асыру барысында жаңа цехтар мен басқа да өндірістік тұрғын-жайлар қайта құрылымдалып салынды, мал соятын, шұжық өндіретін, консервілеу цехтарына және мұздатқыш камераларға арналған жабдықтар орнатылды. Жаңа өндірістегі жабдықтар мен техниканы Польшадағы, Қытай мен Украинадағы жетекші өндірушілер өндірген, өндірістік үдеріс барынша автоматтандырылған. «Торғай Ет» ЖШС директоры Расул Мукановтың айтуынша, жабдықтарды жөндеу барысында кейбір қызметкерлер поляк мамандарының жетекшілігімен жаңа жабдықпен жұмыс жасауды үйренді. Қазірдің өзінде жаңа өндіріс шамамен жетпіс адамды жұмыспен қамтамасыз етіп отыр. 2020 жылға қарай жобалық қуатқа шыққаннан кейін ет өңдейтін кешен қызметкерлерінің саны 110-121 адамға дейін өседі.
Жобаны жүзеге асырудың екінші кезеңінде қосымша 1 млрд теңгені игеру жоспарланып отыр. Жобалық қуатқа шыққаннан кейін, ет комбинаты жыл сайын мың тонна етті, 500 тонна шұжық өнімдерін, 350 тонна консервілер мен 150 тонна жартылай дайындалған өнімдерді өңдейтін болады. Алайда, ет өңдейтін кешенінің әлеуеті мұнымен шектелмейді. Облыс әкімі А.Мухамбетовтың болжамы бойынша, жаңа инвестициялық жоба тек бір Арқалық облысының ғана емес, Қостанай облысының көршілес оңтүстік аудандары мен Қарағанды және Ақмола облыстарының шекаралас өңірлері үшін мал шаруашылығының дамуына серпін береді. Өндірістің тұсаукесер рәсіміне Қарағанды облысының Ұлытау және Нұра аудандарынан, Ақмола облысының Жарқайың және Есіл аудандарынан, Қостанай облысының Амангелді, Жангелді және Наурызым аудандарынан көптеген делегациялар қатысуы кездейсоқ емес. Осы өңірлердегі мал шаруашылығы жаңа өндіріс үшін шикізатты әлеуетті жеткізушілер болып табылады.
«Торғай ЕТ» ЖШС жобасының артықшылығы туралы айтқан кезде, облыс әкімі географиялық факторды негізгі дәлел ретінде келтірді. Арқалық мал шаруашылығы ауданының орталығында орналасқан және оның ірі ет өңдейтін орталыққа айналу мүмкіндігі бар. Сонымен қатар, әкім көлік логистикасы проблемасын шешудің осы жобаны жүзеге асырумен тығыз байланысты екенін атап өтті. Оның айтуынша, Жезқаған және Ақмола өңірлерімен көлік қатынасын қамтамасыз ететін Жезқаған-Петропавл автотасжолының учаскесін қайта құрылымдау жобасын жылжыту жөніндегі жұмыстар республикалық ведомстволар деңгейінде жүргізіліп жатыр.
Дегенмен, әкім тек қана көршілес өңірлер мен Астана қаласын ғана емес, тіпті Қытайды да ет өңдейтін кешеннің өнімдерін сату нарығы ретінде көреді. Сондықтан, ол мамандарға аспан асты елінің тұтыну нарығына оңай кіру үшін өндірушіге өнімдерді Қытай стандарттарына сәйкес сертификаттауға көмектесуді тапсырды. Сонымен қатар, ол Қорғаныс министрлігінің мұқтаждықтары үшін консерві өнімдерін жеткізу мүмкіндігін анықтап жатыр.