Голландиялық бизнесмендер Қостанай облысына инвестиция салуға мүдделі
Қостанай облысына ҚР Нидерландыдағы Құрметті консулдың көмекшісі Марсель Мари Антони келді, ол облыс әкімінің орынбасары Мейіржан Мырзалиевпен кездесу барысында тараптар арасындағы сауда-экономикалық ынтымақтастықты одан әрі дамыту мәселелерін талқылады.
Сапар барысында мемлекеттік органдардың өкілдерімен кездесу өтті, оның аясында Қостанай облысы әкімінің орынбасары Мейіржан Мырзалиев өңірдің инвестициялық ахуалы туралы ақпарат беріп, Нидерланд бизнесмендері үшін ұсыныстар жасады.
Нидерланды Қазақстан экономикасының жетекші еуропалық инвесторы болып табылады. Ынтымақтастық жылдарында Нидерланды Қазақстанға 70 миллиард доллардан астам инвестиция салды. Қазақстанда қазір 800-ден астам бірлескен кәсіпорын жұмыс істейді, олардың басым бөлігі мұнай және газ, геологиялық барлау, ауыл шаруашылығы техникасы мен жабдықтарын жеткізу, фармацевтика және басқа да салаларда шоғырланған.
"Екі ел арасындағы сауда-экономикалық ынтымақтастықтың әлеуеті зор, облыс әкімдігі Қостанай облысы мен Нидерланды Корольдігі арасындағы сауда-экономикалық байланыстарды кеңейтуге көмек көрсетуге дайын екендігін білдіреді. Инвесторлар үшін барлық бағыттар бойынша тартымды ұсыныстар мен қажетті қолдау бар", - деді кездесу барысында облыс әкімінің орынбасары М.Мырзалиев.
ҚР Нидерландыдағы Құрметті консулдың көмекшісі Марсель Мари Антони голландиялық инвесторлардың атынан Қостанай облысымен ынтымақтастыққа қызығушылығын білдірді. Атап айтқанда, Қостанайдағы болашақ АЭА аумағында майлы дақылдарды қайта өңдеу бойынша май өңдеу зауытын ( рапс, күнбағыс) салу жоспарлары бар. "Бұл идея өте перспективалы. Оның үстіне өткізу нарығы бар, майды көрші мемлекеттерге, атап айтқанда Қытай мен Ресейге экспорттауға болады", - деп идеяны қолдады облыс әкімінің орынбасары. Айта кету керек, делегация Қостанай облысына танысу мақсатында келді, онда олар әлеуетті инвесторлардың жобаларын іске асыру болжанып отырған "Қостанай" индустриялық аймағында да болу мүмкіндігіне ие болды. Бірақ ақпан айында голландиялық бизнесмендердің делегациясы Қостанай облысына нақты жоспарларымен, жобаларымен және инвестицияларымен қайта келуді жоспарлап отыр.