Облыс әкімі аппаратының ұйымдастыру-инспекторлық бөлімі туралы ереже

Облыс әкімі аппараты басшысының

2019 жылғы 29 наурыздағы

№ 91 бұйрығына қосымша

 

Облыс әкімі аппараты басшысының

2019 жылғы 3 қаңтардағы

№ 2 бұйрығымен бекітілген

 

 

Облыс әкімі аппаратының

ұйымдастыру-инспекторлық бөлімі туралы ереже

 

 

  1. Жалпы ережелер
  2. Ұйымдастыру-инспекторлық бөлімі (бұдан әрі – Бөлім) «Қостанай облысы әкімінің аппараты» мемлекеттік мекемесінің құрылымдық бөлімшесі болып табылады.
  3. Бөлім өз қызметінде Қазақстан Республикасының Конституциясын, заңдарын, Қазақстан Республикасының Президенті мен Үкіметінің актілерін,  Қазақстан Республикасының өзге де нормативтік құқықтық актілерін, Облыс әкімінің аппараты туралы ережені, Облыс әкімі аппаратының жұмыс регламентін, сондай-ақ осы Ережені басшылыққа алады.
  4. Бөлімнің штаттық санын Қазақстан Республикасы заңнамасында белгіленген тәртіппен облыс әкімі аппаратының басшысы бекітеді.
  5. Ұйымдастыру-инспекторлық бөлімі:

1) Басшыдан;

2) Төрт бас инспектордан;

3) Алты бас маманнан тұрады.

 

  1. Ұйымдастыру-инспекторлық бөлімінің негізгі міндеттері,

                          функциялары, құқықтары және міндеттері

 

           1-міндет: облыс әкімі және әкімдігінің қызметін ұйымдастыруды қамтамасыз ету.

            Функциялары:

  • облыс әкімінің қатысуымен өтетін әкімдіктің отырыстарын, кеңестерін және іс-шараларын дайындау және өткізуді қамтамасыз етеді;
  • регламентке сәйкес әкімнің, облыс әкімі аппаратының жұмыс жоспарларын әзірлейді.

                   2-міндет: облыс әкімдігі актілерінің, қаулыларының, облыс әкімі шешімдерінің, өкімдерінің, тапсырмаларының орындалуын бақылауды және тексеруді ұйымдастыру.

                    Функциялары:

1) облыс әкімдігі қаулыларының, облыс әкімі шешімдерінің, өкімдерінің, тапсырмаларының орындалуын бақылайды;

2) “Қазақстан Республикасындағы сайлау туралы” заңның шеңберінде Қазақстан Республикасы Президентінің, Парламент, жергілікті өкілетті орган депутаттарының сайлауларын, референдумдарды ұйымдастыруды және материалдық – техникалық қамтамасыз етуді жүзеге асырады;

3) облыс әкімінің, қалалар мен аудандар әкімдерінің тұрғындар алдында  есеп беру  кездесулерін ұйымдастыруды қамтамасыз етуді жүзеге асырады. Әкімдердің тұрғындар алдындағы есеп беру кездесулерінің барысында айтылған ұсыныстар мен ескертулердің орындалуына мониторинг жүргізеді;

4) облыстың әкімшілік – аумақтық құрылысын өзгерту мәселелері жөніндегі бірлескен әкімдік қаулылары мен мәслихат шешімдерін дайындауды, материалдарды жинақтауды және талдауды қамтамасыз етеді.

3-міндет: өңірлердегі істің жағдайы туралы облыс әкімін ақпараттық қамтамасыз ету деңгейін көтеру.

          Функциялары:

1) облыс әкіміне, оның орынбасарларына, аппарат басшысына атқарушылық тәртіп жағдайы туралы деректерді ұсынады;

2) жергілікті атқарушы органдардың жұмыс тәжірибесін зерделейді және қорытындылайды, олардың жұмысының тиімділігін арттыру бойынша ұсыныстар енгізеді;

3) ұйымдастыру-инспекторлық жұмысының мәселелері бойынша барлық деңгейлердегі әкімдердің аппараттарына, облыстық департаменттерге, комитеттерге, басқармаларға  әдістемелік көмек көрсетеді;

4) Бөлімге келіп түскен азаматтардың өтініштері мен шағымдарын қарайды.

  1. Құқықтары мен міндеттері:

1) облыстық және аумақтық атқарушы билік органдарынан, барлық деңгейлердегі әкімдіктерден, облыс әкімі аппаратының құрылымдық бөлімшелерінен қажетті ақпаратты, жоспарларды, есептер мен басқа материалдарды сұратып алу;

2) облыс әкімі және әкімдігінің қарауына енгізілген мәселелерді дайындауға қатыстыру үшін облыстық және аумақтық атқарушы билік органдарының, облыс әкімі аппаратының құрылымдық бөлімшелерінің қызметкерлерін тарту;

3) облыс әкімі аппаратының басшысына Бөлімнің және облыс әкімі аппаратының қызметін жетілдіруге бағытталған ұсыныстарды енгізу;

4) облыс әкімі аппараты басшысының келісімі бойынша облыс әкімі, оның орынбасарлары, облыстық басқармалар, департаменттер, комитеттер басшылары, қалалар мен аудандардың әкімдері өткізетін кеңестердің жұмысына қатысу.

 

 

 

  1. Ұйымдастыру-инспекторлық бөлімінің қызметін

ұйымдастыру

 

  1. Бөлім заң шығарушы актілер, Қазақстан Республикасы Президентінің актілеріне, Қазақстан Республикасының өзге де нормативтік құқықтық актілеріне сәйкес өзінің негізгі міндеттері мен функцияларын іске асыруға қажетті өкілеттіктерге ие.
  2. Бөлімді облыс әкімінің өкімімен лауазымға тағайындалатын және лауазымынан босатылатын басшы басқарады.
  3. Басшы Бөлімнің қызметіне жалпы басшылықты жүзеге асырады және Бөлімге жүктелген міндеттер мен олардың өздерінің функцияларын жүзеге асыруына дербес жауап береді.
  4. Бөлім басшысы облыс әкімі аппаратының басшысына Бөлімнің құрылымы мен штаттық кестесі бойынша ұсыныстар береді.
  5. Басшы осы мақсаттарда:

1) Бөлім қызметкерлерінің лауазымдық нұсқаулықтарын анықтайды;

2) Бөлімнің жұмысын жоспарлауды жүзеге асырады;

3) облыс әкімінің аппараты мен әкімдігінің басқа да құрылымдық бөлімшелерімен өзара іс-қимылды жүзеге асырады;

4) Қазақстан Республикасының заңдары мен Президентінің актілеріне сәйкес өзге де өкілеттіктерді жүзеге асырады.

  1. Құрылымдық бөлімшенің құзыретіне кіретін мәселелер бойынша облыс әкімі аппаратының өзге де құрылымдық бөлімшелеріне Бөлімнің атынан жіберілетін  құжаттарға - басшы, ал болмаған жағдайда оны

     ауыстыратын тұлға қол қояды.

 

_______________________________

Дата публикации
04 июня 2020