Мемлекеттік қызмет - бұл көрсетілетін қызметті алушылардың өтініші бойынша немесе өтінішінсіз жеке тәртіппен жүзеге асырылатын және олардың құқықтарын, бостандықтары мен заңды мүдделерін іске асыруға, оларға тиісті материалдық немесе материалдық емес игіліктер беруге бағытталған жекелеген мемлекеттік функцияларды іске асыру нысандарының бірі. (мемлекеттік қызметтер туралы Заңның 1-бабы).
Қазақстан Республикасы Қаржы министрлігінің Мемлекеттік кірістер комитеті салық төлеушілермен байланыстарды барынша азайту мақсатында, сондай-ақ салық төлеушілерге ыңғайлы болу үшін мемлекеттік қызметтер көрсету бойынша мүмкіндіктерді ұдайы кеңейтіп отырады.
Енді сіз үйден немесе кеңседен шықпай-ақ онлайн режимінде Мемлекеттік қызметтерді ала аласыз, оның ішінде ең сұранысқа ие: салық есептілігін қабылдау, жеке кәсіпкерді тіркеу, салықтарды және бюджетке төленетін басқа да міндетті төлемдерді есепке алу және қайтару және тағы басқалар.
Барлық қызметтер мен сервистерді электрондық цифрлық қолтаңба болған кезде салық төлеушінің кабинетінен, электрондық үкіметтің веб-порталы арқылы алуға болады.
Бұдан басқа, өз берешегіңізді білуге, қызметті тоқтата тұру туралы, сондай-ақ ҚҚС төлеуші ретінде тіркелу туралы мәліметтерді Мемлекеттік кірістер органдарының ресми интернет-ресурсында ғана емес, "e-Salyk mobi"мобильдік қосымшасы арқылы да алуға болады.
Мемлекеттік қызметтер туралы Заңның 18-бабына сәйкес мемлекеттік қызметтер көрсетіледі:
1) көрсетілетін қызметті берушілермен;
Көрсетілетін қызметті берушілердің мемлекеттік қызметтер көрсету талаптары мен тәртібі Мемлекеттік қызметтер көрсету тәртібін айқындайтын заңға тәуелді нормативтік құқықтық актімен айқындалады.
Көрсетілетін қызметті алушы мемлекеттік қызмет көрсету тәртібін айқындайтын заңға тәуелді нормативтік құқықтық актіде көзделген тізбеге сәйкес құжаттар топтамасын және (немесе) қолданылу мерзімі өткен құжаттарды толық ұсынбаған жағдайларда көрсетілетін қызметті беруші өтінішті қабылдаудан бас тартады.
2) Мемлекеттік корпорация арқылы;
Көрсетілетін қызметті алушының өтініші мен құжаттарын көрсетілетін қызметті берушілерге қағаз жеткізгіште жіберуді көздейтін Мемлекеттік корпорация арқылы мемлекеттік қызметтер көрсету кезінде өтініштер мен құжаттарды қабылдау күні мемлекеттік қызмет көрсету тәртібін айқындайтын заңға тәуелді нормативтік құқықтық актіде белгіленген мемлекеттік қызмет көрсету мерзіміне кірмейді.
Мемлекеттік корпорацияның қызметкері мемлекеттік қызметті көрсету тәртібін айқындайтын заңға тәуелді нормативтік құқықтық актіде көзделген тізбеге сәйкес құжаттардың толық топтамасы болған кезде көрсетілетін қызметті алушының өтінішін қабылдауға міндетті.
Көрсетілетін қызметті алушы мемлекеттік қызмет көрсету тәртібін айқындайтын заңға тәуелді нормативтік құқықтық актіде көзделген тізбеге сәйкес құжаттар топтамасын, сондай-ақ қолданылу мерзімі өткен құжаттарды толық ұсынбаған жағдайда Мемлекеттік корпорацияның қызметкері өтінішті қабылдаудан бас тартады.
Мемлекеттік корпорация арқылы мемлекеттік қызмет көрсету кезінде көрсетілетін қызметті алушының жеке басын сәйкестендіруді Мемлекеттік корпорация қызметкерлері жүзеге асырады.
Мемлекеттік корпорация арқылы мемлекеттік қызметтер көрсету кезінде көрсетілетін қызметті берушілермен өзара іс-қимыл мемлекеттік қызметтер көрсету мониторингінің ақпараттық жүйесін пайдалана отырып жүзеге асырылады.
3) "электрондық үкімет"веб-порталы арқылы;
Электрондық нысанда мемлекеттік қызметтер көрсету Қазақстан Республикасының заңнамасына сәйкес "электрондық үкіметтің" веб-порталы және "электрондық үкіметтің" шлюзінде, "электрондық үкіметтің" сыртқы шлюзінде орналасқан сервистермен интеграцияланған ақпараттандыру объектілері арқылы жүзеге асырылады.
Электрондық нысанда мемлекеттік қызметті көрсету нәтижесі электрондық құжатты немесе қағаз жеткізгіштегі құжатты не "электрондық үкімет"ақпараттық жүйесінен мәліметтерді беру болып табылады.
4) стационарлық абоненттік құрылғы арқылы;
5) ұялы байланыстың абоненттік құрылғысы арқылы;
Ұялы байланыстың абоненттік құрылғысы арқылы алынған электрондық нысандағы мемлекеттік қызметтерді көрсету нәтижелері пайдаланушының кабинетіне "электрондық үкімет" веб-порталында электрондық құжат нысанында, сондай-ақ көрсетілетін қызметті алушының таңдауы бойынша оның абоненттік нөміріне қысқа мәтіндік хабарлама түрінде жіберіледі.
Ұялы байланыстың абоненттік құрылғысы арқылы алынған электрондық нысандағы мемлекеттік қызметтер көрсету нәтижелерінің міндетті деректемелері, сондай-ақ олардың дұрыстығын тексеру тәртібі Қазақстан Республикасының Ақпараттандыру туралы заңнамасымен реттеледі.
6) орталық мемлекеттік органдар айқындаған ақпараттандыру объектілері арқылы жүзеге асырылады.
Мемлекеттік көрсетілетін қызметтер туралы Заңның 24-бабына сәйкес Қазақстан Республикасында мемлекеттік көрсетілетін қызметтер Қазақстан Республикасының заңдарына сәйкес ақылы немесе тегін негізде көрсетіледі.
Көрсетілетін қызметті алушы үшін тегін ұсынуға Қазақстан Республикасының заңдарымен кепілдік берілген мемлекеттік қызметтер көрсеткені үшін төлемақы белгілеуге жол берілмейді.