Қостанай облысында ауыл шаруашылығы жануарларын сәйкестендіру және олардың қозғалысын бақылау жұмыстары жанданды. Бұл туралы Қостанай облысы ветеринария басқармасы басшысының міндетін атқарушы Марат Күзембаев Өңірлік коммуникациялар қызметінде өткен брифингте мәлімдеді.
Жыл басынан бері өңірге 578 мыңнан астам сырға жеткізілді. Бұл көлем төлдерді дер кезінде сәйкестендіруге және ересек мал басының сырғаларын ауыстыруға толық жеткілікті. 2024 жылы 650 мың сырға сатып алынған болатын — бұл сатып алу жергілікті бюджет есебінен қаржыландырылды.
Ақпан айынан бастап облыста малды түгендеу үшін тоқсан сайын тұрақты үй-үйді аралау жұмыстары жүргізілуде. Мұндай аралау кезінде мамандар есепке алынбаған мал басын анықтап, мал иелеріне түсіндіру жұмыстарын жүргізеді. Азаматтарға жануарларды есепке алу міндеттері мен ветеринариялық заңнаманы бұзғаны үшін жауапкершілік туралы ақпарат берілген жадынамалар таратылады.
21 сәуірден бастап жануарларды есепке алу бойынша мемлекеттік ақпараттық жүйеде (ИСЖ) жаңа функция іске қосылды. Енді туған әрбір бұзау міндетті түрде анасының жеке нөмірімен байланыстырылып тіркелуі тиіс. Сонымен қатар, ауыл шаруашылығы жануарларын сатып алу-сату, сою және есептен шығару жөніндегі барлық операциялар тек жүйе арқылы жүргізіледі. Бұл жануарлардың қозғалысын ашық әрі қадағаланатын етуге мүмкіндік береді.
Сондай-ақ, фермерлер, шаруа және фермерлік қожалықтар, жеке қосалқы шаруашылықтар үшін TortTulik атты мобильді қосымша іске қосылды. Бұл қосымша арқылы пайдаланушылар мал басын цифрлық форматта тіркеп, электрондық ветеринариялық паспорт алып, онлайн түрде мәмілелерді рәсімдей алады.
Ветеринариялық қызмет өкілдерінің айтуынша, ИСЖ жүйесінде мәліметтерді түзету мүмкіндігі қарастырылмаған, сондықтан енгізілген ақпараттың дәлдігі мен өзектілігіне мал иелері толық жауап береді. Жануарларды есепке алуды ретке келтіру жұмысы жалғасуда және ол облыстық ветеринария басқармасының тұрақты бақылауында.