Енді Қостанай тұрғындары жылжымайтын мүлік құқықтарын (ауыртпалықтарды) мемлекеттік тіркеу, жер учаскі актісін, білімі туралы апостиль қойылған құжаттарды, мұрағат анықтамаларын, әскери билеттің телнұсқаларын және басқа да дайын болған барлығы 144 түрлі құжаттарды үйлеріне тапсырыс беріп алдырта алады.
Халыққа қызмет көрсету орталығында тапсырыс берілген құжат дайын болған сәтте, клиентке жеткізу қызметін пайдалануды ұсынатын SMS-хабарлама жолданады.
Клиент келіскен жағдайда жеке сілтеме бойынша өтіп, жеткізу мекенжайын толтыру қажет. Келесі кезекте клиент қала ішінде жеткізу құнын төлеуі керек – 970 теңге. Курьер поштаны тапсырыс берілген күннен бастап бір жұмыс күні ішінде жеткізеді.
- Біз халыққа қызмет көрсету орталығындағы қызмет көрсету үдерісі барынша ыңғайлы болу үшін ғана емес, дайын құжатқа қайта-қайта келудің қажеті болмас үшін қосымша қызметтерді жасап жатырмыз. Адамдардың жұмыстан шығуға немесе балаларын үйде қалдыруға әрқашан мүмкіндігі бола бермейтінін білеміз. Ал құжаттарды жеткізу қызметі тұтынушылардың уақыты мен қаржысын айтарлықтай үнемдейді, – дейді Қостанай қаласы N1 мемлекеттік қызмет көрсету бөлімінің басшысы Олеся Ершова. - Үйге жеткізу қызметі қазір Қостанайда төрт бөлімшеде жұмыс істейді: №1, №2, №3 және мамандандырылған ХҚО.
Еске салайық, «Азаматтарға арналған үкімет» мемлекеттік корпорациясы дайын құжаттарды жеткізу қызметін 2021 жылдың сәуірінде Нұр-Сұлтан, Алматы және Шымкент қалаларында іске қосты. Қазір бұл қызмет Қазақстанның барлық аймақтарында қолжетімді.