2023 жылдың 1 шілдесінен бастап АХАТ бөлімдерінің функциялары «Азаматтарға арналған үкімет» мемлекеттік корпорациясы» КЕАҚ-на өтеді. Функциялар берілгеннен кейін қызметтерге өтінімдерді беру, қабылдау және өңдеу тәртібі өзгермейді.
Неке қиюды тіркеуге өтінішті eGov.kz электронды үкімет порталы арқылы онлайн беруге болады. Өтініш неке күніне 15 күн алдын берілуі керек екенін ескеру қажет. Сонымен қатар, жас жұбайлар өтініш берген кезде некені салтанатты түрде немесе әдеттегі түрде қию жолдарын таңдай алады.
Бұдан басқа, АХАТ қызметтерін тіркеуші органның қызметкерлері ғана көрсететін болады. Мемлекеттік корпорацияның басқа қызметкерлері, оның ішінде ХҚКО операторлары АХАТ бөлімінің ақпараттық жүйесіне қол жеткізе алмайды. Айта кетейік, қызмет көрсету әдісі, оларды қарастыру мерзімі мен тәртібі өзгеріссіз қалады.
Сонымен қатар, мемлекеттік қызметтерді көрсету, атап айтқанда туу мен өлімді тіркеу бойынша қызметтерге төлем ақы алынбайды. Мемлекеттік корпорация ҚҚС төлеуші болып есептеледі. Сондықтан ақылы қызметтердің тарифі қосымша құн салығын ескере отырып белгіленеді.
Естеріңізге сала кетейік, АХАТ органдары тууды, өлімді, неке қиюды және некені бұзу сияқты құжаттарды тіркейді. Бұдан басқа, тіркеуші органдар акт жазбаларына өзгерістер, толықтырулар мен түзетулер енгізеді, азаматтық хал актілерінің жазбаларын қалпына келтіреді және жояды. Сондай-ақ, бастапқы және қайталама куәліктерді, анықтамаларды электрондық нысанда немесе қағаз жеткізгіште шығарады.
Гульнур Кабдыбекова
«Азаматтарға арналған үкімет» мемлекеттік корпорациясы» КЕ АҚ Қостанай облысы бойынша PR-менеджері