«Қостанай облысы әкімдігінің құрылыс, сәулет және қала құрылысы басқармасы» ММ «Alau Solutions» ЖШС мердігерлік ұйымымен жасасқан мемлекеттік сатып алу туралы шарт шеңберінде Тобыл, Арқалық, Жітіқара қалаларының кезекші топографиялық карталарын әзірлеу жүзеге асырылады.
Қазіргі уақытта мердігер жобаны іске асырудың кезекті кезеңін жүзеге асырады: сәулет және қала құрылысы істері жөніндегі жергілікті атқарушы органдармен келісілген Тобыл қаласының құрылыс салынған аумағының шекарасы шегінде инженерлік желілерді түгендеу.
Топографиялық жоспарларда құру және көрсету үшін жер асты коммуникацияларының элементтерін түсіру негізінен цифрлық GPS, тахеометрлік түсіру әдістерімен, сондай-ақ құбырлардың диаметрін, мақсаты мен материалын, өтетін кәбілдердің санын анықтай отырып, түтік кәбіл іздегіштің көмегімен жүргізіледі.