Омар құдығы (Ыбырай Алтынсариннің туған жері)

Омар құдығы – Алтынсарин ауданының көрікті жерлерінің бірі. Осы өлкеде Ыбырай Алтынсариннің атасы Балғожа бидің тұрағы орналасқан. Бұл жерде 1841 жылы ұлы ғалым, ағартушы, педагог, жазушы, этнограф, фольклоршы, қоғам қайраткері. Ы.Алтынсарин дүниеге келген.

Ол қазақтың ағартушылық тарихында және ұлттық мектебінің қалыптасуында терең із қалдырды. Бүгін сол жерде құдық кесіндісі және ескерткіш плита орнатылған. Ұлы педагогтің туған жері осы күнге дейін аудан қонақтары мен тұрғындарының үлкен қызығушылығын туғызады.

Балғожа би өмір сүрген Қостанай мен Алтынсарин ауданында бүгінде оның ұрпақтары тұрады. Бұл маң тарихта Арақарағай болысына қараған. Балғожа би өмір сүрген, Ыбырайдың туған жері – Мезгіл ауылы. Жергілікті көнекөз қариялардың айтуынша, осы маңайда Үлкен Мезгіл, Кіші Мезгіл, Қошанның Мезгілі деген сияқты атаулар көп. Бұл жерге – 1991 жылы Ыбырай бабаның 150 жылдық торқалы тойының қарсаңында ескерткіш тақта орнатылған.  Кезінде осы жерді Балғожа бидің Жаңбыршы ұлынан тараған Қошан, Омар ұрпақтары мекендеген. Осы маңайда шамамен 50-60 үй болған көрінеді.