Қоянақ әулие Жолшарақызының кесенесі

Қоянақ әулие Жолшарақызы –   бітім – болмысы ерекше, өнегесі халық жадында жатталған ел анасы.

Әкесі Жолшара, атасы Тастемір де атағы жер жарған әз әулие атанған жандар. Қоянақ әжемізге Алла тарапынан берілген айрықша қасиет өз әкесі Жолшара әулиеден дарыған. Алла берген ұлы қасиетіне тәнті болған ұрпақтары дертке қуат қылып, талай жылдар басына түнеп-жатып, Ұлы жаратушының жарылқауынан үміт ететін. Дертіне дауа, науқасына шипа тілеп, зарығып барған талайлар дерттерінен айығып, рухтары саламаттанып, ойлағаны болып, діттегеніне жетіп, көзайым болып оралатын. Қаншама жылдар өтіп, ұрпақтар ауысып жатса да,  ел  анасы  Қоянақ  әулиенің басына барушы жамағат легі толастамады, рухына демеу іздеп жабыққандар әр қиырдан ат сабылтып келулерін тоқтатпады. Осындай құрметке бөленген, дүниеден озса да ұрпақтарын киелі рухымен аялап, жабыққанды жұбатып, тарыққанды демеп, дерттілерге – дәру, мұңайғанға қуат бола білген рухы шалқар, аруағы асқақ Қоянақ әже Жолшарақызы ел анасы болып, бауырынан рулы ел өрбіген, өсіп өнген, асқарлы – шақарлы әулеттің мейірбан да қамқор әжесі ретінде де халық ілтипатына иеленген.

Текті ата, ару ананың бүгінгі көзі тірі ұрпақтары әже рухын қастерлеп, басына кесене  орнатып, құлпытас тұрғызып, азаматқа тән өнегелі де жан сүйсінерлік  өрелі ісімен ерекшеленді.