Құтан әулие Аталықұлы кесенесі

Аманкелді ауданының Амантоғай ауылының маңында, Қарынсалды өзеніне жақын жерде Құтан әулие бейіті орналасқан. Кесене бірнеше рет жаңартылған.

Ұлытау өңірінде дүниеге келген Құтан Аталықұлы (1690-1780) халық арасында әулие атанған. Оған бала кезінен әулиелік, көріпкелдік, емшілік қонып, бар ғұмырында халықты емдеумен айналысқан. Елдің, жердің тағдырына араласқан. Абылай хан заманында  Құтан әулие – ханның кеңесшісі, хан алқасының мүшесі болған байсалды, ақылды адам.

Торғай даласына өз ауылымен көшіп келе жатқанда дүниеден озған. Аңыз бойынша әулие: «Денемді ақ түйеге артып жіберіңдер,  түйе қай жерге тоқтаса, сол жерге жерлеңдер» деп өсиет айтқан. Араға бірнеше күн салып, ақ түйе Қарынсалды өзенінің шығыс жақ қарсаңындағы биік қырға келіп шөккен. Сөйтіп, киелі Құтан әулие осы жерге жерленген.