2021 жылдан бастап мемлекеттік қызметтен теріс себептер бойынша босатылған адамдар мемлекеттік кірістер органдарына кірістері мен мүлкі туралы декларацияны ұсына ма?
Бұдан бұрын, 2021 жылғы 1 қаңтарға дейін "Сыбайлас жемқорлыққа қарсы іс-қимыл туралы" ҚР Заңына (11-баптың 3-тармағы) сәйкес мемлекеттік қызметтен теріс себептер бойынша босатылған адамдар босатылғаннан кейінгі үш жыл бойы тұрғылықты жері бойынша Мемлекеттік кіріс органына кірістері мен мүлкі туралы декларацияны (есептілік нысаны 230.00) ұсынуға міндетті болатын.
Жалпыға бірдей декларациялаудың енгізілуіне байланысты 2021 жылғы 1 қаңтардан бастап кірістері мен мүлкі туралы Декларацияны 230.00 нысаны бойынша ұсыну жөніндегі талаптар, оның ішінде мемлекеттік қызметтен теріс себептер бойынша шығарылған адамдар үшін тоқтатылады.
2020 жылы мүліктік табысты, Қазақстан Республикасынан тыс жерлердегі көздерден табысты және Салық кодексінің 363-бабында көзделген өзге де кірістерді алған жағдайда аталған тұлғалар орналасқан (тұрғылықты) жері бойынша салық органына жеке табыс салығы бойынша декларацияны (240.00-нысан) табыс ететінін ескеру қажет. Осы декларацияны тапсыру мерзімі 2021 жылғы 31 наурыздан кешіктірмей.
Егер жеке тұлға 2020 жылға 230.00 нысан бойынша қате декларация тапсырған жағдайда, онда мұндай декларация кері қайтарып алуға жатады.
Салық заңнамасында жалпыға бірдей декларациялауды енгізу төрт кезеңде айқындалған.
Қостанай қаласы бойынша мемлекеттік кірістер басқармасы