Идеология саласындағы қызмет мемлекеттік саясатты жүйелі түрде түсіндіруге, халықтың ақпараттандырылу деңгейін арттыруға, қоғамдық диалогты нығайтуға және әлеуметтік-саяси, қоғамдық-экономикалық дамудың өзекті мәселелері бойынша сындарлы қоғамдық пікір қалыптастыруға бағытталған.

Қостанай облысында қала және аудан әкімдіктері жанынан 21 ақпараттық-түсіндіру тобы (АТТ) жұмыс істейді. Олардың құрамына мемлекеттік органдардың, сарапшылар қауымдастығының және қоғам өкілдері кіреді.

АТТ қызметінің негізгі бағыттары Қазақстан Республикасы Конституциясының ережелерін және жүргізіліп жатқан конституциялық реформаларды, Мемлекет басшысының Жолдаулары мен тапсырмаларын, сондай-ақ «Таза Қазақстан» экологиялық акциясы, «Заң және тәртіп» бастамасы және өңірлерді дамыту жөніндегі шараларды қоса алғанда, мемлекеттік саясаттың негізгі бастамаларын түсіндіру болып табылады.

Тұрғындармен, еңбек ұжымдарымен, жастармен және қоғам өкілдерімен тұрақты түрде кездесулер өткізіліп, тікелей диалог пен кері байланыс қамтамасыз етіледі.

Ақпараттық-түсіндіру жұмысының тиімділігін арттыру мақсатында мемлекеттік органдардың өкілдері, сарапшылар қауымдастығы және қоғамдық пікір көшбасшыларынан құралған 181 спикерден тұратын пул қалыптастырылды. Спикерлер халықпен кездесулерге, қоғамдық және сараптамалық іс-шараларға қатысып, сондай-ақ мемлекеттік саясаттың негізгі бағыттарын бұқаралық ақпарат құралдары мен әлеуметтік желілерде ақпараттық сүйемелдеуді қамтамасыз етеді.

АТТ мүшелерінің кәсіби деңгейін арттыру мақсатында 2026 жылғы 22–24 сәуір аралығында Қостанай қаласында Қостанай облысы әкімдігінің Қоғамдық даму басқармасының мемлекеттік әлеуметтік тапсырысы аясында «SanalyUrpaq-2050» қоғамдық қоры ұйымдастырған «Халықпен жұмыс істейтін ақпараттық-түсіндіру топтарының мүшелеріне арналған тренингті ұйымдастыру» тақырыбында үш күндік оқыту тренингі өткізілді.

Тренингке облыстың қалалары мен аудандарындағы ақпараттық-түсіндіру топтарының өкілдері қатысты. Бағдарлама халықпен тиімді коммуникация орнату, көпшілік алдында сөйлеу, дағдарыстық жағдайларға ден қою, сондай-ақ бұқаралық ақпарат құралдарымен және әлеуметтік желілермен өзара іс-қимыл жасау дағдыларын дамытуға бағытталды.

Іс-шара барысында қоғамдық коммуникациялар саласында практикалық тәжірибесі бар облыстық деңгейдегі сарапшылар спикер ретінде сөз сөйледі.

Бөлім қоғамдық-саяси іс-шараларды ұйымдастырушылық, ақпараттық және сараптамалық сүйемелдеуді жүзеге асырады.

2026 жылғы наурызда республикалық референдумды дайындау және өткізу бойынша кешенді жұмыс жүргізілді. Атап айтқанда, желілік жоспарлар әзірленіп, ұйымдастырушылық іс-шаралар үйлестірілді, спикерлер мен сарапшылар тартылды, қоғамдық бақылау және халықты ақпараттандыру жұмыстары қамтамасыз етілді.

Сондай-ақ тамыз айында Курултай сайлауына қатысты электоралдық науқан аясында тиісті ақпараттық және ұйымдастырушылық сүйемелдеу жұмыстары жүргізілді. Негізгі назар сайлау процесінің кезеңдерін түсіндіруге, спикерлер мен сарапшылардың қатысуын қамтамасыз етуге және азаматтарды ашық әрі объективті ақпараттандыруға аударылды.

Мемлекеттік және ұлттық мерекелерге арналған іс-шараларды ұйымдастыру идеологиялық жұмыстың маңызды бағыттарының бірі болып табылады. Олар қазақстандық бірегейлікті, патриотизмді, қоғамдық келісім мен жалпыұлттық бірлікті нығайтуға, тарихи жады мен мәдени дәстүрлерді сақтауға бағытталған.

Қостанай облысында мерекелік іс-шаралар облыстық, қалалық және аудандық деңгейлерде халықтың, жастардың, қоғамдық ұйымдар, еңбек ұжымдары, мәдениет және білім беру саласы өкілдерінің кеңінен қатысуымен өткізіледі. Бөлім іс-шаралардың жиынтық жоспарларын әзірлеуді, оларды үйлестіру мен ұйымдастырушылық сүйемелдеуді, сондай-ақ бұқаралық ақпарат құралдары мен әлеуметтік желілерде ақпараттық жариялауды қамтамасыз етеді.

Іс-шаралардың мазмұны патриоттық және азаматтық құндылықтарды дәріптеуге, тарихи мұраға және мемлекеттік рәміздерге құрметті қалыптастыруға, сондай-ақ қоғамдық келісім мен жалпыұлттық бірлікті нығайтуға бағытталған.

Мәселен, 2026 жылғы 4 маусымда Қостанай қаласында Қазақстан Республикасының Мемлекеттік рәміздер күніне орайластырылған «Адал азамат: елге қызмет, рәмізге құрмет» атты облыстық форум өтті.

Форумға мемлекеттік органдардың, депутаттық корпустың, қоғамдық ұйымдардың өкілдері, жастар, волонтерлер, сарапшылар қауымдастығы және өңір тұрғындары қатысты. Іс-шара барысында азаматтық жауапкершілік, патриотизм, конституциялық құндылықтар және мемлекеттік рәміздердің жалпыұлттық бірлікті нығайтудағы рөлі талқыланды.

Форум аясында салтанатты шара, «Патриот – 2026» байқауы жеңімпаздарын марапаттау рәсімі, шақырылған спикерлердің сөз сөйлеуі және мерекелік концерттік бағдарлама ұйымдастырылды.

Іс-шараның құрметті қонағы - Зейнеп Ахметова, жазушы, қоғам қайраткері, Бауыржан Момышұлының келіні, қазақтың ұлттық дәстүрлерін насихаттаушы.

Сондай-ақ SMART-центр «IQostanay» алаңында азаматтық жауапкершілік, патриотизм, креативті индустриялар және экологиялық мәдениет мәселелеріне арналған бірқатар тақырыптық іс-шаралар өтті.

- «Конституция және азамат» диалог алаңында құқықтық мәдениет пен азаматтық жауапкершілік мәселелері талқыланды. Спикерлер: ҚР Парламенті Мәжілісінің депутаты Абзал Құспан және Республикалық адвокаттар алқасының төрағасы Мәди Мырзағараев.

- «Креативті патриотизм: мәдениет ұлтты қалай қалыптастырады» тақырыбындағы TED-style talk және ашық дәріс барысында мәдениет пен креативті индустриялардың ұлттық бірегейлікті қалыптастырудағы рөлі қарастырылды. Спикер - Қазақстанның креативті индустриялар альянсының президенті Давид Туганов.

- «Болашақтың волонтерлері: Таза Қазақстан» интерактивті алаңында экологиялық волонтерлікті дамыту және қоғамдық бастамаларды қолдау мәселелері талқыланды. Спикер - Neco экологиялық клубының жетекшісі Наурызбек Бирмағамбетов.

Қостанай облысының 90 жылдығына арналған іс-шаралар аясында Еркін Әбіл мен Аманжол Күзембайұлының авторлығымен «Қостанай өлкесінің қысқаша тарихы» атты монография жарық көрді.

Басылым Қостанай өлкесінің қалыптасу және даму тарихына арналған және өңірдің тарихи-мәдени мұрасын сақтауға әрі насихаттауға бағытталған. Басылымның таралымы — 50 дана.

Сонымен қатар, 2026 жылы бөлім мемлекеттік әлеуметтік тапсырыс аясында қоғамдық өзара іс-қимылды дамытуға, азаматтық және патриоттық құндылықтарды нығайтуға, сондай-ақ «Адал азамат» қағидаттарын ілгерілетуге бағытталған 3 жобаны іске асыруда.

«Қоғамдық даму платформасы: құзыреттерді дамыту және қоғамдық өзара іс-қимылды нығайтуға бағытталған іс-шаралар циклі» жобасы ақпараттық-түсіндіру топтары мүшелерінің кәсіби құзыреттерін арттыруға және негізгі қоғамдық құндылықтарды ілгерілетуге бағытталған.

Жоба аясында:

- 22–24 сәуірде ақпараттық-түсіндіру топтарының мүшелеріне арналған оқыту тренингі өткізіліп, 152 адам қамтылды;

- 28 сәуірде «Халық Конституциясы – ұлттық құндылықтар мен бірліктің айнасы» тақырыбында сараптамалық алаң ұйымдастырылды. Іс-шараға ҚР Парламенті Сенатының депутаты Б.Б. Аққұжина, ҚР Парламенті Мәжілісінің депутаты У. Шапақ, мемлекеттік органдардың, мәслихаттардың, сарапшылар мен ғылыми қауымдастықтың, азаматтық қоғамның, саяси партиялардың және БАҚ өкілдері қатысты. Қамту - 150 адам.

Тақырыптық подкасттар сериясы аясында YouTube платформасында тәуелсіздік, патриотизм, бірлік пен ынтымақ, «Заң және тәртіп», жасампаздық пен жаңашылдық сияқты негізгі жалпыұлттық құндылықтарға арналған 4 шығарылым жарияланды.

Подкасттарға республикалық деңгейдегі спикерлер қатысты:

- Ербол Ердембекұлы Тлешов — Қазақстан Республикасы Ғылым және жоғары білім министрлігінің Тіл саясаты комитетінің төрағасы;

- Бибігүл Беркутқызы Аққұжина — Қазақстан Республикасы Парламенті Сенатының депутаты;

- Унзила Шапақ — Қазақстан Республикасы Парламенті Мәжілісінің депутаты;

- Давид Туганов— Қазақстанның Креативті индустриялар альянсының президенті.

«Әділ мемлекеттің, біртұтас ұлттың және патриотизмнің құндылығын қалыптастыру және нығайту жөніндегі кешенді іс-шараларды ұйымдастыру» жобасы жалпыұлттық құндылықтарды дәріптеуге, жастардың өңір тарихы мен мәдени мұрасына қызығушылығын арттыруға бағытталған.

Жоба аясында мамыр–шілде айларында облыстық патриоттық «Таным жолы – Торғайдан» байқауы өткізілді. Байқауға 50 өтінім келіп түсіп, оның ішінде 25 қатысушы екінші кезеңге өтті. Финалдық кезеңге 10 үздік команда қатысты. Қорытындысы бойынша 4 жеңімпаз команда анықталып, олар үшін Торғай өңіріне танымдық сапар ұйымдастырылды. Жеңімпаздар қатарында Федоров, Алтынсарин аудандарының, Қостанай және Рудный қалаларының өкілдері бар.

Жоба аясында жалпыұлттық құндылықтарға арналған 4 ашық дәріс өткізілді. Дәрістер тәуелсіздік пен патриотизм, бірлік пен ынтымақ, еңбекқорлық пен кәсібилік, жасампаздық пен жаңашылдық тақырыптарын қамтыды.

Іс-шараларға республикалық деңгейдегі спикерлер қатысты:

- Ербол Ердембекұлы Тлешов — Қазақстан Республикасы Ғылым және жоғары білім министрлігінің Тіл саясаты комитетінің төрағасы;

- Александра Суслова — педагог, Қазақстан Жазушылар одағының мүшесі;

- Зейнеп Ахметова — жазушы, қоғам қайраткері, қазақтың ұлттық дәстүрлерін насихаттаушы, Бауыржан Момышұлының келіні;

- Давид Туганов — Қазақстанның Креативті индустриялар альянсының президенті.

«Адал азамат қағидатын нығайту және патриоттық тәрбие беру жөніндегі іс-шаралар кешені» жобасы жастардың азаматтық жауапкершілігін, патриотизмін, адалдығын, еңбекқорлығын және қоғамдық өмірге белсенді қатысуын дамытуға бағытталған.

Жоба аясында Жітіқара және Б. Майлин аудандарында жастардың қатысуымен 2 патриоттық іс-шара өткізілді. Кездесулерге Қостанай облыстық мәслихатының депутаттары Динара Утебаева және Александра Сергазинова қатысты. Іс-шаралар барысында азаматтық жауапкершілік, патриоттық тәрбие және жастардың қоғамдық белсенділігі мәселелері бойынша ашық диалог ұйымдастырылды.

21–22 шілдеде Мендіқара ауданында облыстық «Мен – Адал азаматпын» эссе байқауының жеңімпаздары — 25 жас көшбасшының басын қосқан «ADAL URPAQ» жазғы білім беру лагері өткізілді.

Лагерь бағдарламасы көпшілік алдында сөз сөйлеу, медиасауаттылық және командалық жұмыс дағдыларын дамытуға арналған тренингтерді қамтыды. Сонымен қатар қатысушылар қазақстандық кино актері, блогер және креативті индустрия өкілі Ильяс Көпжасаровпен мотивациялық кездесуге қатысты.

Мемлекеттік рәміздер туралы заңнаманың сақталуын мониторингілеу

Бөлім қызметінің негізгі бағыттарының бірі - Қазақстан Республикасының мемлекеттік рәміздерін насихаттау бойынша мемлекеттік органдардың жұмысын үйлестіру және Қазақстан Республикасының 2007 жылғы 4 маусымдағы №258 «Қазақстан Республикасының мемлекеттік рәміздері туралы» Конституциялық заңы талаптарының сақталуына мониторинг жүргізу.

2026 жылға арналған жұмыс жоспарына сәйкес Қостанай облысының 7 өңірінде, сондай-ақ облыстық мемлекеттік органдарда мемлекеттік рәміздер туралы заңнаманың сақталуына мониторинг жүргізілді. Барлығы 278 мемлекеттік мекеме мен ұйым қамтылды.

Мониторинг қорытындысы бойынша 32 заң бұзушылық анықталды. Оның ішінде 3 жағдай заңнама талаптарына, 29 жағдай ұлттық стандарттар талаптарына сәйкес келмеуіне байланысты.

Жауапты тұлғалардың құқықтық және практикалық сауаттылығын арттыру, сондай-ақ әдістемелік қолдау көрсету мақсатында мемлекеттік мекемелер мен ұйымдарда мемлекеттік рәміздерді қолдану және пайдалану мәселелері бойынша семинарлар өткізілді. Іс-шараларға 546-дан астам адам қатысты.

Аталған жұмыс мемлекеттік рәміздерді белгіленген талаптарға сәйкес қолдануды қамтамасыз етуге, заңнама нормаларын сақтау деңгейін арттыруға және оларды пайдалану мәдениетін қалыптастыруға бағытталған.

Қостанай облысының саяси партияларымен өзара іс-қимыл

2026 жылғы 1 қыркүйектегі жағдай бойынша Қостанай облысында саяси партиялардың 7 филиалы жұмыс істейді: «ӘДІЛЕТ» партиясы» ҚБ ҚОФ; «Қазақстанның «Ақ жол» демократиялық партиясы» ҚБ ҚОФ; «Қазақстан Халық партиясы» ҚБ ҚОФ; Қостанай облысы бойынша «Ауыл» партиясы» РҚБ ӨФ; «Жалпыұлттық социал-демократиялық партиясы» ҚБ ҚОФ; «Respublica» партиясы» ҚБ ҚОФ; «Қазақстанның «Байтақ» жасылдар партиясы» ҚБ ҚОФ.

Облыстағы саяси партиялар мүшелерінің жалпы саны 93 937 адамды құрайды.

«ӘДІЛЕТ» партиясы

2026 жылғы 19 маусымда «Әділет» саяси партиясының облыстық филиалы әділет органдарында тіркелді.

Қолданыстағы депутаттық корпус құрамындағы «AMANAT» партиясынан сайланған депутаттардың өкілдігі алдыңғы сайлаудың қорытындыларына сәйкес сақталуда.

Облыс бойынша партия мүшелерінің жалпы саны – 31 011 адам.

Партияның 21 аумақтық филиалы және 266 бастауыш партия ұйымы бар. «Жастар Рухы» жастар қанатының мүшелер саны – 1 605 адам, Әйелдер қанатының мүшелер саны – 259 адам.

Барлық деңгейдегі мәслихаттардағы депутаттардың жалпы саны – 170 адам, оның ішінде:

- облыстық мәслихат – 23;

- қалалық мәслихат – 34;

- аудандық мәслихаттар – 113.

«Ақ жол» партиясы

Партия мүшелерінің жалпы саны - 8 090 адам. Партияның жастар қанатының құрамында 250 адам бар.

Барлық деңгейдегі мәслихаттарда «Ақ жол» партиясынан 27 депутат бар, оның ішінде:

- облыстық мәслихат - 3;

- қалалық мәслихаттар - 7;

- аудандық мәслихаттар - 17.

«Ауыл» партиясы

Партия мүшелерінің жалпы саны 8 774 адамды құрайды. Облыста 119 бастауыш партия ұйым жұмыс істейді. Партияның жастар қанатының саны - 2 997 адам. Барлық деңгейдегі мәслихаттарда партиядан 22 депутат бар, оның ішінде:

- облыстық мәслихат - 3;

- қалалық мәслихаттар - 4;

- аудандық мәслихаттар - 15.

Облыстың барлық өңірлерінде партияның жауапты өкілдері айқындалған.

Қазақстан Халық партиясы (ҚХП)

Облыстағы партия мүшелерінің жалпы саны 8 067 адамды құрайды. Партияның 1 өкілдігі (Арқалық қаласында) және 51 бастауыш партия ұйымы жұмыс істейді.

Облыстық мәслихатта партия атынан 1 депутат өкілдік етеді. ҚХП жастар қанатының саны - 32 адам, әйелдер қанатының саны - 25 адам.

Жалпыұлттық социал-демократиялық партия (ЖСДП)

Партия мүшелерінің жалпы саны 5 493 адам.

Қостанай облыстық ЖСДП филиалы Рудный және Арқалық қалаларында, Қарабалық және Бейімбет Майлин аудандарында, сондай-ақ Қостанай қаласының Аэропорт шағынауданында орналасқан 5 бастауыш партия ұйымын қамтиды.

ЖСДП жастар қанатының саны – 1178 адам. Облыс өңірлеріндегі мәслихаттарда партиядан депутаттар жоқ.

«Respublica» партиясы

Партия филиалы 2023 жылғы 24 қаңтарда әділет органдарында тіркелді. Қазіргі уақытта облыста аумақтық филиалдар жоқ.

Партия мүшелерінің жалпы саны 32 154 адамды құрайды. 37 бастауыш партия ұйымы жұмыс істейді.

Партияның жастар қанатының саны - 757 адам, ReWomen әйелдер қауымдастығының мүшелері - 197 адам.

Барлық деңгейдегі мәслихаттарда партиядан 20 депутат бар, оның ішінде:

- облыстық мәслихат - 1;

- қалалық мәслихаттар - 4;

- аудандық мәслихаттар - 15.

«Байтақ» Қазақстанның жасылдар партиясы

Партия филиалы 2023 жылғы 24 қаңтарда әділет органдарында тіркелді. Облыста партияның аумақтық филиалдары жоқ.

Партия мүшелерінің жалпы саны 348 адамды құрайды.

Қостанай облысының саяси партиялары партиялық құрылымдарды дамытуға және халықпен өзара іс-қимылды нығайтуға бағытталған ұйымдастырушылық және ақпараттық-түсіндіру жұмыстарын жүргізуде.

Партиялар азаматтармен кездесулер өткізіп, бастауыш партия ұйымдары мен жастар құрылымдарының қызметін кеңейтуде, қоғамдық бастамалар мен іс-шараларды ұйымдастыруда, сондай-ақ азаматтарды партия қатарына тарту бойынша жұмыстар жүргізуде.

Жергілікті атқарушы органдар Қазақстан Республикасының қолданыстағы заңнамасы шеңберінде барлық саяси партиялармен сындарлы өзара іс-қимылды қамтамасыз етеді. Негізгі назар ашық диалогты нығайтуға, қоғамдық маңызы бар мәселелерді қарауға және партиялардың өңірдің қоғамдық өміріне қатысуына жағдай жасауға аударылады.