Қазақстан Республикасы Денсаулық сақтау министрлігінің Медициналық және фармацевтикалық бақылау комитеті Қазақстан Республикасының Денсаулық сақтау министрлігімен бірлесіп, медицина қызметкерлерінің кәсіби сақтандыру институтын енгізу тетігін түсіндіру жұмысын жүргізуде.
Комитет пен Министрлік медицина қызметкерлерінің кәсіби сақтандыру институтын енгізу мәселелері бойынша жүйелі ақпараттық-түсіндіру жұмыстарын жүргізуде. Бұл шара денсаулық сақтау саласы мамандарының кәсіби міндеттерін орындау барысында құқықтық және әлеуметтік қорғалуын қамтамасыз етуге бағытталған.
Медицина қауымдастығын ақпараттандыру және олардың құқықтық сауаттылығын арттыру мақсатында еліміздің өңірлеріне шығу кестесі бекітілді. Осы іс-шаралар аясында Комитеттің орталық аппараты мен Денсаулық сақтау министрлігінің өкілдері медицина қызметкерлерімен кездесулер өткізіп, кәсіби сақтандыру жүйесінің мақсаты, міндеттері, құқықтық негіздері мен практикалық аспектілері бойынша түсіндіру жұмыстарын жүргізуде.
Кәсіби сақтандыру денсаулық сақтау саласында қауіпсіз, тұрақты және әділетті ортаны қалыптастырудың маңызды құралы ретінде қарастырылады. Бұл тетік медицина қызметкерлеріне кәсіби қызметін адал орындау кезінде олардың кінәсі болмаса да объективті себептермен туындаған кәсіби қателіктерден қорғауға, шағымдар мен өзге де тәуекелдер туындаған жағдайда құқықтық кепілдіктер беруге мүмкіндік береді.
Атап айтқанда, Қазақстан Республикасының «Халық денсаулығы және денсаулық сақтау жүйесі туралы» Кодексінің 146-бабына сәйкес, медициналық көмек көрсету нәтижесінде пациенттің денсаулығына келтірілген залал белгіленген тәртіппен өтелуге жатады. Кәсіби сақтандыру мұндай жағдайларды әділ қарауға мүмкіндік беріп, медицина қызметкерлерінің өз кәсіби міндеттерін адал орындаған жағдайдағы негізсіз шағымдардан қорғануын қамтамасыз етеді.
Сонымен қатар, Кодекстің 7-бабының 5) тармақшасына сәйкес, мемлекет медицина қызметкерлерінің кәсіби қызметін жүзеге асыру барысында құқықтық қорғалуын, оның ішінде кәсіби жауапкершілікті сақтандыру тетіктерін енгізу арқылы қамтамасыз етеді.
Жүргізіліп жатқан науқан аясында сақтандыру жағдайлары, өтініш беру тәртібі, медициналық ұйымдар, сақтандыру компаниялары және мемлекеттік органдар арасындағы өзара іс-қимыл алгоритмдеріне ерекше назар аударылуда. Осы мақсатта оқыту семинарлары, дөңгелек үстелдер және медицина қауымдастығымен өзге де диалогтық форматтар ұйымдастырылуда.
Кәсіби сақтандыру институтын кешенді іске асыру денсаулық сақтау жүйесін жаңғыртудағы маңызды кезең болып табылады, бұл медицина қызметкерлерінің мәртебесін арттыруға, олардың құқықтық қорғалуын күшейтуге және соның нәтижесінде медициналық көмектің сапасын жақсартуға ықпал етеді.