17 мамырда ҚР Премьер-министрі Әлихан Смайыловтың төрағалығымен экономиканы демонополизациялау жөніндегі комиссияның отырысы өтті.
Отырысқа орталық мемлекеттік органдардың, Бас прокуратураның, БҚДА, ҚМА және басқа да ведомстволардың басшылары қатысты.
Комиссия Денсаулық сақтау саласында ақпараттық қызметтер көрсету нарығында бәсекелестікті дамыту жөніндегі шараларды қарады.
Бүгінгі таңда нарықтың 80% - дан астамын «Даму» АТО» ЖШС-не тиесілі «Damumed» жүйесі қамтиды.
Ағымдағы жылдың 27 сәуірінде экономиканы демонополизациялау жөніндегі комиссияның тапсырмасын орындау мақсатында «Даму» АТО» ЖШС Денсаулық сақтау министрлігіне әзірленіп жатқан «Е-Денсаулық» жүйесінің базасында медициналық деректердің бірыңғай республикалық қоймасын құру және олардың медициналық ұйымдар арасында алмасуын іске асыру үшін «Damumed» деректер базасын берді.
Өз кезегінде, бұл үшінші тарап жеткізушілеріне медициналық ұйымдарға бәсекелестік негізде тиісті қызметтер көрсетуге мүмкіндік береді.
Айта кетейік, бұл шара республикалық деңгейде медициналық ақпараттық жүйелер арасында деректер алмасудың толыққанды тетігінің болмауы себебінен қолданылды. Дәл осы жағдай нарықта бәсекелестікке жатпайтын жағдайларды қалыптастырды, нәтижесінде қазақстандық медициналық ұйымдардың бір медициналық ақпараттық жүйеден екіншісіне ауысу қиындықтары туындады.
Үкімет басшысы «Е-Денсаулық» жүйесін құру бойынша жұмысты жеделдету және осы саланы реттеудің тиімділігін арттыру бойынша заңнамалық түзетулер дайындау қажеттігін атап өтті.