Республика күніне арналған салтанатты іс-шара өткізілді

   25 қазан – Қазақстан тарихындағы маңызды күндердің бірі. Дәл осы күні 1990 жылы Қазақ КСР-нің Мемлекеттік егемендігі туралы Декларация қабылданды және бұл елдің тәуелсіздік жолындағы алғашқы қадамы болды.

   Декларация Қазақ КСР-нің егемендігін жариялады және Қазақстанның тәуелсіз мемлекет ретіндегі саяси-құқықтық негіздерін айқындады. Онда алғаш рет аумақтың тұтастығы, бөлінбейтіндігі мен қол сұғылмаушылығы, халықтар мәдениеті мен олардың тілдерін дамыту, ұлттық бірегейлікті нығайту сияқты мемлекеттілік қағидаттары бекітілді.

   Өткен жылдан бастап 25 Қазан – Республика күні еліміздің жалғыз ұлттық мерекесі болды.

   2023 жылғы 24 қазанда Комитетте Республика күнін мерекелеуге арналған салтанатты іс-шара өткізілді.

   Комитет төрағасы Салтанат Сабырбаева құттықтау сөз сөйлеп, Комитет, «Резерв» РМК, сондай-ақ оның филиалдарының қызметкерлеріне ҚР ТЖМ ведомстволық наградаларын табыстады. «Резерв» РМК Бас директоры Ришат Асансеитов те ұжымды құттықтап, өз атынан Кәсіпорын жұмыскерлеріне алғыс хаттар табыстады.

   Іс-шараға қатысушыларға мереке тарихы туралы деректі бейнеролик көрсетілді және концерттік бағдарлама ұйымдастырылды.