Қоғамдық кеңесте Қаржы министрлігінің цифрлық сервистері таныстырылды

2021 жылдың 22 қыркүйегінде Қаржы министрлігінің ақпараттық жүйелері Қаржы бойынша қоғамдық кеңесте көрсетілді.

Қоғамдық кеңестің отырысы Рустам Жүрсіновтың төрағалығымен өтті.

Қаржы вице-министрі Бақтияр Қожахметов өз баяндамасында Қаржы министрлігі мемлекеттік қызметтердің 50 түрін көрсететінін, оның 46-ы немесе 92% -ы электронды түрде көрсетілетінін атап өтті. Ағымдағы жылдың 8 айында Министрлік шамамен 14 млн.қызмет көрсетті. Оның ішінде электронды түрде 13,6 млн. немесе 97,6%.

«Мемлекеттік қызметтерді көрсетудің электронды нысаны бізге азаматтар мен бизнестің уақыт және қаржы шығындарын оларды көрсету мерзімдерін қысқарту есебінен төмендетуге, сондай-ақ мемлекеттік қызметтерді алу кезінде бір-бірімен кездеспегендіктен сыбайлас жемқорлық тәуекелдерін төмендетуге мүмкіндік береді», - деді Б.Қожахметов.

Салықтық және кедендік әкімшілендіруді цифрландыру әділ фискалдық жүйе мен сапалы сервисті қамтамасыз ету арқылы бизнес пен халық үшін қолайлы жағдайлар жасауға бағытталған.

Нәтижесінде, цифрландыру және әкімшілендіру есебінен 2 жыл ішінде бюджетке түсетін түсімдердің 900 млрд.теңгеден астамы қосымша қамтамасыз етілді (2019 – 523 млрд. теңге, 2020 – 395 млрд. теңге).

Мемлекеттік кірістер комитеті төрағасының орынбасары Жайдар Іңкәрбаев халық арасында танымал «e-Salyq Azamat» мобильді қосымшасы мен «e-Salyq Business» жаңа мобильді қосымшасы қызметтерін көрсетті.
«E-salyq-Business» қосымшасының көмегімен жеке кәсіпкерлер тіркеліп, есеп жүргізе алады және кәсіпкерлігін «бір батырманы басу» арқылы жаба алады, сондай-ақ басқа да салық міндеттемелерін орындай алады.

Сондай-ақ, спикер отырысқа қатысушыларға «ЭШФ» ақпараттық жүйесінің, тәуекелдерді басқару жүйесінің мүмкіндіктерін таныстырды.