"«Электрондық шот-фактуралар» ақпараттық жүйесінде шарттарды ресімдеу (енгізу) жөніндегі пилоттық жобаны іске асыру қағидаларын бекіту туралы" бұйрық жобасы

 «Электрондық шот-фактуралар» ақпараттық жүйесінде шарттарды ресімдеу (енгізу) жөніндегі пилоттық жобаны іске асыру қағидаларын бекіту туралы

 

«Салық және бюджетке төленетін басқа да міндетті төлемдер туралы» Қазақстан Республикасы Кодексінің (Салық кодексі) 68-бабы 1-1-тармағына сәйкес БҰЙЫРАМЫН:

  1. Қоса беріліп отырған Бас мердігер мен қосалқы мердігерлік ұйымдар арасында шарттарды ресімдеу (енгізу) жолымен «Электрондық шот-фактуралар» ақпараттық жүйесін дамыту бойынша пилоттық жобаны іске асыру қағидалары бекітілсін.
  2. Қазақстан Республикасы Қаржы министрлігінің Мемлекеттік кірістер комитеті Казақстан Республикасының заңнамасында белгіленген тәртіппен:

1) осы бұйрықтың Қазақстан Республикасының Әділет министрлігінде мемлекеттік тіркелуін;

2) осы бұйрықтың Қазақстан Республикасы Қаржы министрлігінің интернет-ресурсында орналастырылуын;

3) осы бұйрық Қазақстан Республикасының Әділет министрлігінде мемлекеттік тіркелгеннен кейін он жұмыс күні ішінде осы тармақтың 1) және 2) тармақшаларында көзделген іс-шаралардың орындалуы туралы мәліметтердің Қазақстан Республикасы Қаржы министрлігінің Заң қызметі департаментіне ұсынылуын қамтамасыз етсін.

  1. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі және 2025 жылғы 1 шілдеге дейін қолданылады.

 

Лауазымы                                                                              Аты-жөні

 

Бұйрықпен бекітілген

 

«Электрондық шот-фактуралар» ақпараттық жүйесінде шарттарды ресімдеу (енгізу) жөніндегі пилоттық жобаны іске асыру қағидалары

 

 1-тарау. Жалпы ережелер

 

  1. Осы «Электрондық шот-фактуралар» ақпараттық жүйесінде шарттарды ресімдеу (енгізу) жөніндегі пилоттық жобаны іске асыру қағидалары (бұдан әрі – Қағидалар) «Салық және бюджетке төленетін басқа да міндетті төлемдер туралы» Қазақстан Республикасы Кодексінің (Салық кодексі) 68-бабы 1-1-тармағына сәйкес әзірленді және Қазақстан Республикасының аумағында пилоттық жобаны іске асыру тәртібін айқындайды. «Электрондық шот-фактуралар» ақпараттық жүйесінің (бұдан әрі – ЭШФ АЖ) функционалын өнім беруші мен ол тартқан қосалқы мердігер арасында салық міндеттемелерінің орындалуын бақылауды жүзеге асыруға арналған шарттарды ресімдеу (енгізу) жолымен кеңейту мақсатында айқындайды.
  2. Осы Қағидалардың шеңберінде мынадай ұғымдар пайдаланылады:

1) қосалқы мердігер – Қазақстан Республикасының Азаматтық кодексінде көзделген нормаларға сәйкес жұмыстардың не көрсетілетін қызметтердің жекелеген түрлерін орындауға арналған шартты орындау үшін тартылған жеке немесе заңды тұлға;

2) мемлекеттік сатып алу туралы шарт – «Мемлекеттік сатып алу туралы» Қазақстан Республикасының Заңына сәйкес тапсырыс беруші мен өнім беруші арасында электрондық цифрлық қолтаңбалармен куәландырылған азаматтық-құқықтық шарт;

4) өнім беруші (бас мердігер) – кәсiпкерлiк қызметтi жүзеге асыратын жеке тұлға (егер Қазақстан Республикасының заңдарында өзгеше белгiленбесе, мемлекеттiк мекемелердi қоспағанда), тапсырыс берушiмен мемлекеттiк сатып алу туралы жасасқан шартта оның контрагенті ретiнде әрекет ететiн заңды тұлға, заңды тұлғалардың уақытша бiрлестiгi (консорциум).

  

2-тарау. "Электрондық шот-фактуралар" ақпараттық жүйесінде шарттарды ресімдеу (енгізу) жөніндегі пилоттық жобаға қатысушылар

 

  1. Мыналар:

1) өнім беруші;

2) қосалқы мердігерлер;

3) мемлекеттік кірістер органдары Пилоттық жобаның қатысушылары болып табылады.

 

3-тарау. "Электрондық шот-фактуралар" ақпараттық жүйесінде шарттарды ресімдеу (енгізу) жөніндегі пилоттық жобаны енгізу тәртібі

 

  1. Егер заң актiлерiнен немесе шарттан өзгеше туындамаса, мердiгер шартты орындауға басқа тұлғаларды (қосалқы мердiгерлердi) тартуға құқылы.

Мемлекеттік сатып алу туралы шартта көзделген жұмыстардың не көрсетілетін қызметтердің жекелеген түрлерін орындауға арналған шартты қосалқы мердігер ЭШФ АЖ ресімдейді (енгізеді).

Шартты ресімдеу осы тармақта көрсетілген шартты орындауға тартылған барлық қосалқы мердігерлерге қолданылады.

  1. Осы Қағидалардың 4-тармағына сәйкес шартты ЭШФ АЖ ресімдеу (енгізу) кезінде «Мемлекеттік сатып алу туралы» Қазақстан Республикасының Заңына сәйкес мердігер жасасқан мемлекеттік сатып алу туралы шарттың нөмірі мен күні көрсетіледі.
  2. Мемлекеттік кіріс органдары салықтық әкімшілендірудің өзге тәртібін жүзеге асыру мақсатында ЭШФ АЖ ресімделген шарттар бойынша бақылауды жүзеге асырады.
  3. Пилоттық жобаны жүргізу кезінде дербес деректерді жинау, өңдеу және қорғау «Дербес деректер және оларды қорғау туралы» Қазақстан Республикасының Заңына сәйкес жүзеге асырылады.

 

 

 

 

 

 

"«Электрондық шот-фактуралар» ақпараттық жүйесінде шарттарды ресімдеу (енгізу) жөніндегі пилоттық жобаны іске асыру қағидаларын бекіту туралы" бұйрық жобасы
Дата публикации
23 октября 2024