Шымкент қаласы бойынша Мемлекеттік кірістер департаменті, Салық кодексіне сәйкес, 2021 жылдың көлік құралдарына салынатын салықты жеке тұлғалар 2022 жылдың 1 сәуірінен кешіктірмей төлеуі керек екенін еске салады.
Меншік құқығында салық салу объектілері бар жеке тұлғалар көлік құралдарына салық төлеушілер болып табылады.
Қазақстан Республикасында тіркелген және есепте тұрған тіркемелерді қоспағанда, көлік құралдары салық салу объектілері болып табылады.
Салық төлеуші Салық кодексінің 492 бабына сәйкес салық салу объектісіне салық ставкаларын қолдану жолымен салық кезеңі үшін салық сомасын дербес есептейді.
Назар аударамыз, ҚР ҚМ Мемлекеттік кірістер комитеті kgd.gov.kz порталының электронды сервистер бөлімінде салықты есептеу калькуляторы орналастырылған, салық кезеңі, көлік құралы қозғалтқышының түрі мен көлемі туралы деректерді енгізу қажет, электрондық сервис тиесілі соманы өзі есептейді.
E-SalykAzamat мобильді қосымшасында (PlayMarket AppStore арқылы жүктеу) салықты есептеу электрондық сервис орналастырылған.
2021 жылға арналған көлік салығын есептеу үшін 2021 жылғы 1 қаңтарда қолданыста болған АЕК қолданылады, яғни 2917 теңге.
Салықты уақытылы және толық көлемде төлеуге шақырамыз.
Шымкент қаласы бойынша
МКБ Түсіндіру жұмыс басқармасы