Жалпыға бірдей декларациялау – жеке тұлғалар үшін салық декларацияларын міндетті түрде тапсыруды кезең-кезеңмен енгізу процесі. Бұл механизм азаматтардың кірістерінің ашықтығын арттыруға, салықтық тәртіпті күшейтуге және көлеңкелі экономиканы қысқартуға бағытталған. Жалпыға бірдей декларациялаудың негізгі мақсаты – жеке тұлғалардың кірістері мен мүлкін есепке алу жүйесін қалыптастыру және әділ салық салуды қамтамасыз ету.
Декларациялау жүйесі кірістер, мүлік, активтер, қаржылық міндеттемелер және заңнамада айқындалған басқа да көрсеткіштер туралы мәліметтерді ұсынуды көздейді. Жалпыға бірдей декларациялау кезең-кезеңімен жүзеге асырылады, салық төлеушілердің әртүрлі санаттарын, ең алдымен мемлекеттік қызметкерлер мен квазимемлекеттік сектор басшыларын қамтиды.
Жалпыға бірдей декларациялау азаматтардың салық жүйесіне деген сенімін арттыруға, кірістер мен мүлікті заңдастыруға алғышарттар жасауға, сондай-ақ мемлекетке салық төлеуден жалтару және сыбайлас жемқорлықпен күресте неғұрлым тиімді болуға мүмкіндік береді.