Халықпен тұрақты кездесу кестесіне байланысты аудан әкімінің міндетін атқарушы Мұхтар Батырханұлы Қарабұлақ ауылдық округі, Қарабұлақ және А. Нүсіпбеков ауылдарының тұрғындарымен кездесу өткізді. Жиыннан кейін жеке тұлғаларды қабылдады. Сұрақтар мен ұсыныстар тыңдалып, тиісті тапсырмалар берілді.
А. Нүсіпбеков және Қарабұлақ ауылдарында округ әкімінің халықпен кездесуі өтті. Жылдық жоспар талқыланып, сұрақтарға жауап берілді.
06.02.2025 ж. сағат 10:00 де Ақай Нүсіпбеков ауылы мәдениет үйі.
06.02.2025 ж. сағат 14:30 да Қарабұлақ ауылы Қарабұлақ орта мектебі.
21 қаңтар 2025 жылы А. Нүсіпбеков ауылында шағын футболдан көшеаралық жарыс өткізілді. Жарыс қонағы әрі демеушілік көрсеткен кикбоксингтен Әлем кубогінің иегері, екі дүркін Еуропа, Азия және 12 дүркін Қазақстан чемпионы Елмұрат Қайыпжанов салтанатты ашылуында тілегін арнады. Ақсақалдарымыздың батасы, аналарымыздың шашуымен, спорт ардагерлерінің құттықтау сөзімен басталған жарыс қараңғылық қоюланғанша жалғасты. Әр көше ыстық астары мен ақ самауырдан шайын ұсынып, плакаттарға жалынды ұрандар жазып көтеріп, мерекелік көңіл сыйлады. Бірлігі бекем ел озады деген бабалар сөзі осындай ынтымаққа негізделсе керек. Бастаманы қолдаған көпшілікке, табандылықпен ұйымдастыра білген көше басшыларына , спорт нұсқаушылары мен "Рабат "шекара заставасына АЛҒЫС білдіреміз. Ең үздік мергенге өз балаларыңыз спорт журналисі, ақын, қаламгер Есей Жеңісұлы тілегін арнап, сый көрсетті. Спорт бұқаралығын арттыру, салауатты өмір салтын насихаттау жолында келешекте осындай ауқымды жарыстар ұйымдастыратын боламыз.
Жарыс нәтижесі:
1-орын "Рабат" Ш/З "А" тобы
2-орын "Рабат"Ш/З "Б" тобы
3-орын Ә.Жүнісов көше командасы
4-орын Н.Мәшкеев көше командасы.
Жарыс барысында ең көп доп салған мергендер :
Ерсін Мырзаш, Диас Нүрәбілда болды.
Сондай-ақ әр командадан үздік ойыншылар марапатталды.
"Ұлағат" аналар кеңесінің мүшесі Кәрібаева Гүлжахан "Балапан" шағын орталығына барып "Ертегілер әлемінде" тақырыбында балаларға ертегі айтып берді.
Округ әкімі Әлімов Рүстем Жеңісұлы Ақай Нүсіпбеков ауылындағы "Рабат" шекара заставасында жас сарбаздармен кездесті. Әскери өмірге жаңа қадам басқан шекарашыларға ауыл тарихы, тұрмысы, келешек даму жоспары жайында мағлұматтар берді. Жауынгерлік рұх, отансүйгіштік жөнінде пікір алмасты.
30.12.2024 жылы округте жыл қорытындысы бойынша дәстүрлі салтанатты "Жыл үздігі 2024" шарасы өтті. " Мейірімді жүрек", "Үздік аула", Ұйымшыл көше", "Бірлік" аталымдары бойынша сыйлықтар тапсырылды. Округтің әлеуметтік, рухани, мәдени дамуына үлес қосқан ауыл тұрғындары марапатталды. Сонымен қатар 1988 жылғы туған ауыл азаматтарының демеушілігімен округ әкімінің жаңа жылдық шыршасы өтті.
Қазақстан Республикасы Мемлекеттік қызмет істері агенттігінің Алматы облысы бойынша департамент басшысының міндетін атқарушы Болат Исахановтың төрағалығымен Мемлекеттік қызмет көрсету мәселелері жөніндегі ведомствоаралық жұмыс тобының отырысы өтті.
Күн тәртібінде жұмыс тобының құрамын және 2025 жылға арналған жұмыс жоспарын бекіту мәселелері, Іле ауданы мен Ұйғыр ауданында мемлекеттік қызметтер көрсетудің қолжетімділігі мен сапасына қоғамдық мониторинг нәтижелері қаралды.
Отырыс барысында Іле ауданы әкімі аппаратының мемлекеттік қызметтер мониторингі және ақпараттық технологиялар бөлімінің басшысы Жарылқасын Яхия мен Ұйғыр ауданы әкімі аппаратының мемлекеттік қызметтер мониторингі және ақпараттық технологиялар бөлімінің басшысы Өмірсерік Үстембайдың баяндамалары тыңдалды.