Мектепке дейінгі білім беру жүйесінің 2020-2021 оқу жылына арналған негізгі міндеті Қазақстан Республикасында білім беруді және ғылымды дамытудың 2020-2025 жылдарға арналған мемлекеттік бағдарламасында айқындалған мақсатты жүзеге асыруға - балалардың жеке қажеттіліктерін ескере отырып, олардың үйлесімді жан-жақты дамуы үшін жағдай жасауға бағытталған.
Республикада 10 719 мектепке дейінгі ұйым жұмыс істейді, оның ішінде мемлекеттік – 6 269 бірлік (ондағы балалар – 539 020), жеке меншік – 4 450 бірлік (ондағы балалар-367 780). 6 843 балабақшада 788 388 бала, 3 876 шағын орталықта 118 412 бала тәрбиеленуде.
Мектепке дейінгі ұйымдармен қамтылған барлық балалар саны 906 800, оның ішінде 1-6 жастағы балалар – 78,7%, 3-6 жастағы балалар – 98,5%, 1-3 жастағы балалар – 42,7% құрайды. Алматы (98,4), Қостанай (99,8) облыстарынан, Нұр-Сұлтан қаласынан (96,1), Алматы қаласынан (87,1) басқа барлық өңірлерде балаларды мектепке дейінгі ұйымдармен 100% қамтуға қол жеткізілді. 100% көрсеткішке қол жеткізбеу өңірлердегі көші-қон және демографиялық процестерге байланысты.
2019 жылы 642 мектепке дейінгі ұйым ашылды. 2020 жылғы тамыздағы жағдай бойынша 125 мыңға жуық бала немесе 28,1% - ы мектепке дейінгі ұйымдарға жолдама алды.
Жаңа оқу жылының басында мектепке дейінгі тәрбие мен оқыту мазмұнының сапасын арттыру үшін Білім министрлігі нормативтік базаны жетілдіру бойынша ауқымды жұмыс жүргізді:
- Мектепке дейінгі тәрбие мен оқытудың мемлекеттік жалпыға міндетті стандартына (ҚР БҒМ 2020 жылғы 5 мамырдағы № 182 Бұйрығы);
- Мектепке дейінгі тәрбие мен оқытудың үлгілік оқу жоспарларына (ҚР БҒМ 2020 жылғы 12 мамырдағы № 195 бұйрығы);
- Мектепке дейінгі ұйымдарға арналған білім беру қызметін көрсетудің үлгілік шартына (ҚР БҒМ 2020 жылғы 15 сәуірдегі № 143 бұйрығы) өзгерістер мен толықтырулар енгзілді.
Мектепке дейінгі тәрбие мен оқыту сапасын арттыруға бағытталған барлық шаралар балаларды мектепте оқытуға табысты дайындауға және ата-аналардың мектепке дейінгі білім беру қызметтеріне қажеттілігін қанағаттандыруға мүмкіндік береді.