Қазақстандағы кәріз желілерінің жартысынан астамы тозған, ал тұрғын үйлер мен кәсіпорындардан шығатын сарқынды суларды қабылдайтын тазарту құрылыстарының орташа тозу деңгейі 65%-дан асады. «Энергетикалық және коммуналдық секторларды жаңғырту» ұлттық жобасы (МЭКС) аясында еліміз бойынша 7,8 мың шақырым су құбыры мен кәріз желілерін жаңарту, сондай-ақ 45 қалада тазарту құрылыстарын салу және реконструкциялау жоспарлануда. Ауқымды жаңғырту жұмыстарына шамамен 1,9 трлн теңге қарастырылған.
Бұл туралы бүгін Орталық коммуникациялар қызметінде өткен брифингте ҚР Өнеркәсіп және құрылыс министрлігінің өкілдері мәлімдеді.
Ұлттық жоба тұрғын үйлерді, мектептерді, ауруханалар мен кәсіпорындарды күнделікті сумен қамтамасыз етуге, сондай-ақ пайдаланылған суды бұру мен тазартуға қажетті инфрақұрылымды қамтиды. Жобаны іске асыру аясында тозған коммуналдық желілер мен құрылыстарды кезең-кезеңімен жаңарту көзделген.
Еліміздегі су құбыры желілерінің жалпы ұзындығы 111 мың шақырымды құрайды, оның 38%-ы тозған. Ал кәріз желілеріндегі жағдай күрделірек. Жалпы ұзындығы 18 мың шақырым болатын кәріз желілерінің тозу деңгейі 54%-ға жеткен. 2029 жылға қарай бұл көрсеткіштерді тиісінше 33% және 41%-ға дейін төмендету жоспарлануда.
Осы мақсаттарға қол жеткізу үшін шамамен 5 мың шақырым су құбыры желісін жаңартуға 700 млрд теңге, ал 2,8 мың шақырым кәріз желісін жаңғыртуға 400 млрд теңге қарастырылған. 2026 жылдың қорытындысы бойынша су құбыры желілерінің тозу деңгейін 37%-ға, кәріз желілерінің тозуын 52%-ға дейін төмендету жоспарланып отыр.
Брифинг барысында жаңғырту жұмыстарының қазіргі барысы да таныстырылды. МЭКС аясында жалпы құны 356 млрд теңгені құрайтын сумен жабдықтау және су бұру саласындағы 146 жоба іске асырудың әртүрлі кезеңінде тұр. Оның ішінде 157 млрд теңгеге бағаланған 95 жоба су құбыры желілерін жаңартуға, ал құны 199 млрд теңге болатын 51 жоба кәріз инфрақұрылымын жаңғыртуға бағытталған.
Қазіргі уақытта 69 жоба іске асырылып жатыр, 23 жоба екі кезеңдік іріктеуден өтіп, конкурстық рәсімдерге дайындалуда, ал қалған 54 жоба қажетті келісу рәсімдерінен өтуде.
Бұдан бөлек, 2026 жылы бюджет қаражаты есебінен сумен жабдықтау және су бұру саласындағы 345 жобаны іске асыруға 309 млрд теңге бөлінді. Бұл қаражат қалалар мен ауылдық елді мекендердегі инфрақұрылымды жаңартуға бағытталған.
Брифингке қатысушылар тазарту құрылыстарының жай-күйіне де жеке тоқталды. Тозған құбырларды ауыстыру мәселенің бір бөлігін ғана шешеді. Өйткені тұрғын үйлерден, әлеуметтік нысандар мен кәсіпорындардан шығатын пайдаланылған су кәріз желілері арқылы арнайы тазарту құрылыстарына жеткізіліп, қоршаған ортаға ағызылар алдында тазартудан өтеді. Бұл нысандардың жай-күйіне кәріз жүйесінің жұмысы ғана емес, елді мекендердің санитариялық және экологиялық қауіпсіздігі де байланысты.
Еліміздегі тазарту құрылыстарының орташа тозу деңгейі 65%-дан асады. Сондықтан ұлттық жобаның жеке бағыттарының бірі ретінде 45 қалада кәріз-тазарту құрылыстарын салу және реконструкциялау белгіленген. Бұл жұмыстарға шамамен 800 млрд теңге қарастырылған.
«Біздің міндетіміз — жекелеген учаскелерді ғана емес, сумен жабдықтау және су бұру жүйесін кешенді түрде жаңарту. Егер сарқынды сулар келіп түсетін тазарту құрылыстары тозған жабдықтармен жұмысын жалғастыра берсе, ескі құбырларды ауыстырудың өзі жеткіліксіз. Сондықтан жаңғырту жұмыстары су құбыры желілерін де, кәріз жүйелерін де, тазарту нысандарын да қамтиды. Түпкі мақсат — тұрғындарды сенімді коммуналдық қызметтермен қамтамасыз ету және қалаларда ұзақ мерзімді пайдалануға арналған заманауи инфрақұрылым қалыптастыру», — деп атап өтті ҚР Өнеркәсіп және құрылыс министрлігі Құрылыс және тұрғын үй-коммуналдық шаруашылық істері комитетінің төрағасы.
Брифингте қаралған тағы бір маңызды мәселе — сумен жабдықтау саласын цифрландыру. Желілерді ауыстыру және тазарту құрылыстарын реконструкциялаумен қатар, су арналары кәсіпорындарына жабдықтардың жұмысын, су шығыны мен желілердегі қысымды бақылауға, су ағуын дер кезінде анықтауға және апаттық жағдайларға жедел әрекет етуге мүмкіндік беретін бақылау жүйелері енгізілуде.
Бірінші кезеңде 25 қаладағы 32 сумен жабдықтау кәсіпорны автоматтандыру және есепке алу құралдарын енгізу бойынша жалпы сомасы 54 млрд теңгені құрайтын өтінім берді. Оның ішінде 12 млрд теңгеге бағаланған сегіз өтінім бойынша мердігерлермен шарттар жасалды, ал 17 млрд теңгені құрайтын тағы жеті өтінім конкурстық рәсімдер кезеңінде тұр. Осындай жұмыстар басқа 62 су арнасы кәсіпорнымен де жүргізілуде.
Айта кетейік, цифрландырудың негізгі құралдарының бірі әзірлену сатысындағы Smart Turmys бірыңғай платформасы болмақ. Ол абоненттер, су тұтыну көлемі, коммуналдық қызметтер үшін төлемдерді есептеу және төлеу туралы мәліметтерді біріктіреді. Бұл коммуналдық кәсіпорындарға өзекті деректермен жұмыс істеуге, ал тұрғындарға есеп айырысу туралы неғұрлым ашық ақпарат алуға мүмкіндік береді.
Сонымен қатар, брифинг барысында интеллектуалды есепке алу құралдарына көшу тәртібі түсіндірілді. Есептегіштерді ауыстыру кезең-кезеңімен жүргізіледі. Тексеруден өткен, жарамды және өндіруші белгілеген пайдалану мерзімі аяқталмаған есептегіштерді мерзімінен бұрын ауыстыру талап етілмейді.
Еске сала кетейік, коммуналдық инфрақұрылымды жаңғыртумен қатар, елімізде халықты мемлекеттік қолдау шаралары да жүзеге асырылуда. 2026 жылы ауыз су беру қызметінің құнын субсидиялауға 28 млрд теңге қарастырылған. Бұл қаражат есебінен мемлекет кәсіпорындарға қызмет құнының бір бөлігін өтейді. Нәтижесінде тұрғындар суды оның толық өзіндік құнынан төмен тариф бойынша тұтына алады.
Бұдан бөлек, коммуналдық шығындары жергілікті мәслихаттар белгілеген отбасы табысының шекті үлесінен асатын азаматтарға тұрғын үй көмегі қарастырылған. Бүгінгі таңда осы мақсаттарға жергілікті бюджеттерден 400 млн теңге төленіп, шамамен 8 мың алушыға қолдау көрсетілді.
Бүгін Душанбе қаласында «Орталық Азияға арналған бірыңғай сейсмикалық нормаларды әзірлеу» жобасы бойынша жұмыс тобының халықаралық кеңесі басталды. Екі күнге — 14–15 қазанға жоспарланған іс-шара Халықаралық ғылыми-техникалық орталықтың (ХҒТО) қатысуымен ұйымдастырылды.
Кеңеске Қазақстан, Тәжікстан және Қырғыз Республикасының өкілдері, сондай-ақ Канада мен АҚШ-тан келген халықаралық сарапшылар қатысуда.
Бірыңғай сейсмикалық нормаларды әзірлеу бастамасын «Қазақ құрылыс және сәулет ғылыми-зерттеу және жобалау институты» акционерлік қоғамы (ҚазНИИСА АҚ) көтерді. Жұмыс Орталық Азия елдерінің нормативтік талаптарын жақындастыруға, ғылыми-техникалық ынтымақтастықты дамытуға және сейсмикалық қауіпті аймақтардағы құрылыс қауіпсіздігін арттыруға бағытталған.
Екі күн ішінде қатысушылар сейсмикаға төзімді құрылыс саласындағы қолданыстағы ұлттық нормаларды, есептік сейсмикалық жүктемелерді анықтау әдістерін және ғимараттар мен құрылыстарды жобалаудың заманауи тәсілдерін қарастырады. Сондай-ақ Жапония, Түркия, Канада және АҚШ тәжірибесіне ерекше назар аударылады. Бұл тәжірибені өңір елдерінің нормативтік базасын жетілдіру кезінде пайдалану мүмкіндіктері талқыланады.
Бірыңғай сейсмикалық нормаларды әзірлеу әр елдің ерекшеліктері мен тәуекелдерін ескере отырып, ғимараттар мен құрылыстардың сейсмикалық төзімділігін қамтамасыз етудің келісілген тәсілдеріне негіз қалыптастыруды көздейді. Бұл Орталық Азия мемлекеттерінің ғылыми және инженерлік әлеуетін біріктіріп, сейсмикаға төзімді құрылыс саласындағы мамандардың өзара ынтымақтастығын нығайтуға мүмкіндік береді.
Кеңес қорытындысы бойынша жобаны іске асырудың келесі кезеңдері талқыланып, нормативтік талаптарды жетілдіру және сейсмикалық қауіпті аймақтардағы ғимараттар мен құрылыстардың қауіпсіздігін арттыру бағытындағы бірлескен жұмыстың басымдықтары айқындалады.
Құрылыс кезеңінде пәтер сатып алу құжаттар мен мәміле талаптарын мұқият тексеруді қажет етеді. Қазақстанда көппәтерлі тұрғын үйлердің құрылысын салу үшін азаматтардың қаражатын тарту «Тұрғын үй құрылысына үлестік қатысу туралы» Қазақстан Республикасының Заңымен реттеледі.
Қаражатты салмас бұрын таңдалған нысанның заң талаптарына сәйкес іске асырылып жатқанына көз жеткізіңіз.
Қаражат тартудың заңда көзделген қандай тәсілдері бар?
Азаматтардың қаражаты мына негіздердің бірі болған жағдайда тартылуы мүмкін:
- Бірыңғай оператордың кепілдігі болған кезде;
- екінші деңгейдегі банктің жобаны іске асыруға қатысуы арқылы;
- көппәтерлі тұрғын үйдің қаңқасы тұрғызылғаннан кейін үлескерлердің қаражатын тарту арқылы.
Егер құрылыс салушыда азаматтардың қаражатын тартуға заңда көзделген негіз болмаса, салынып жатқан үйдегі пәтер үшін төлем жасамау қажет.
Сатып алмас бұрын нені тексеру керек?
1. Құрылыс салушы мен нысанды
Компания, тұрғын үй кешені және оның құрылысына қатысты құжаттар туралы ақпаратты зерделеңіз.
2. Қаражат тарту негізін
Жобаның заңда көзделген тетіктердің бірі арқылы іске асырылып жатқанына көз жеткізіңіз.
3. Шартты
Пәтердің құнына, төлем жасау тәртібіне, құрылысты аяқтау және тұрғын үйді тапсыру мерзімдеріне, сондай-ақ тараптардың құқықтары мен міндеттеріне қатысты талаптармен мұқият танысыңыз.
4. Шарттың тіркелуін
Үлескерлердің қатысуы туралы шарт белгіленген тәртіппен тіркелуге тиіс.
Шарттың нысанына назар аударыңыз
Пәтер сатып алу кезінде алдын ала шарттар, брондау шарттары, инвестициялық келісімдер және басқа да құжаттар ұсынылуы мүмкін.
Шарттың атауы мәміленің заңдылығын өздігінен айқындамайды. Егер құжат іс жүзінде көппәтерлі тұрғын үй құрылысына азаматтардың қаражатын заңда белгіленген тетіктерді айналып өтіп тарту үшін пайдаланылса, мұндай схемаға жол берілмейді.
Ақпаратты қайдан тексеруге болады?
Мәміле жасамас бұрын тұрғын үй кешені мен құрылыс салушы туралы мәліметтерді ресми цифрлық сервистер арқылы тексеру ұсынылады.
Тұрғын үй нысандары туралы ақпарат Homeportal.kz порталында қолжетімді. Сондай-ақ мәліметтерді eGov, Halyk, Alatau, БЦК және Еуразиялық банк сияқты тиісті мемлекеттік және цифрлық сервистер арқылы тексеруге болады.
Қаражатты заңсыз тартқаны үшін жауапкершілік
Заңнама талаптарын бұзғаны үшін әкімшілік жауапкершілік көзделген:
- жеке тұлғаларға — 200 АЕК;
- шағын кәсіпкерлік субъектілеріне — 500 АЕК;
- орта кәсіпкерлік субъектілеріне — 750 АЕК;
- ірі кәсіпкерлік субъектілеріне — 1 000 АЕК;
- ірі кәсіпкерлік субъектілері талаптарды қайталап бұзған жағдайда — 2000 АЕК.
Төлем жасамас бұрын — қысқаша чек-парақ
- Құрылыс салушы мен тұрғын үй кешері тексерілді;
- қаражат тартудың заңды негізі анықталды;
- шарт мұқият зерделенді;
- үлестік қатысу туралы шарт тіркелген;
- төлем жасау тәртібі шарт талаптарына сәйкес келеді.
Негізгі қағида: алдымен тексеріңіз — содан кейін төлем жасаңыз.
Мәміле жасалғанға дейін ақпарат пен құжаттарды мұқият тексеру салынып жатқан тұрғын үйді сатып алу кезінде тәуекелдерді азайтуға мүмкіндік береді.
Қазақстан Республикасы Өнеркәсіп және құрылыс вице-министрі Қуандық Қажкенов RUKHTYLAR және «Не молчи, сирота» қоғамдық қорларының өкілдерімен жұмыс кездесуін өткізді.
Кездесу барысында азаматтарды тұрғын үймен қамтамасыз ету мәселелері, оның ішінде тұрғын үйді бөлудің қолданыстағы тетіктері, азаматтарға қойылатын негізгі шарттар мен талаптар талқыланды.
Тұрғын үймен қамту бойынша мемлекеттік қолдау шараларын жетілдіруге, олардың қолжетімділігі мен баспанаға мұқтаж жандарға берілу ісін күшейту мәселесіне ерекше назар аударылды. Қоғамдық қорлардың өкілдері өз ұсыныстарын жеткізіп, адамдардың іс жүзінде кездесетін түйткілді мәселелерін атап өтті.
Кездесу барысында айтылған ұсыныстар мен көтерілген мәселелер зерделеніп, қолданыстағы заңнама шеңберінде қаралатын болады.
Қазақстанда азаматтарды қолжетімді тұрғын үймен қамтамасыз ету бағытында жүйелі жұмыстар жалғасуда. 2026 жылы 20,4 млн шаршы метр тұрғын үй, яғни шамамен 188 мың пәтерді пайдалануға беру жоспарланған. Биылғы сегіз айдың қорытындысы бойынша 11,3 млн шаршы метр тұрғын үй немесе 105,9 мың пәтер пайдалануға берілді.
Қазақстан халқына Жолдауында Мемлекет басшысы Қасым-Жомарт Тоқаев тұрғын үй мәселесінің айрықша әлеуметтік маңызын атап өтіп, баспана мәселесін өз бетінше шешуге табысы жеткіліксіз азаматтарға тиімді қолдау көрсету қажеттігін айтты. Осыған байланысты мемлекеттік тұрғын үй саясаты тұрғын үйдің қолжетімділігін арттыру және қолдау шараларын баспанаға мұқтаж азаматтарға бағыттау ісін жандандыруды көздейді.
Бүгінде азаматтарға жеңілдетілген несиелеу, жалдамалы тұрғын үй, жалдау ақысын субсидиялау, тұрғын үй сертификаттары және тұрғын үй бағдарламаларын қамтитын кешенді қолдау шаралары ұсынылады. Биыл «2-10-20» және «5-10-20» жеңілдетілген ипотекалық бағдарламалары бойынша 6,2 мың несие берілді. «Наурыз» бағдарламасы аясында 350 млрд теңгеге 11,9 мың несие ұсынылды. Сондай-ақ 11,2 мың отбасы жалдау ақысын субсидиялау тетігімен қамтылды.
Жұмыстың тағы бір маңызды бағыты – жалдамалы тұрғын үймен қамтамасыз ету. Жыл басынан бері азаматтарға 12 653 жалдамалы пәтер берілді. Бұған дейін сатып алу құқығынсыз берілген жалдамалы тұрғын үйлерді жекешелендіру жұмыстары да жалғасуда. Биылғы сегіз айда бұл мүмкіндікті 6,8 мыңнан астам отбасы пайдаланды.
Мемлекеттік тұрғын үй саясатын іске асыруға «Қазақстан Тұрғын үй компаниясы» АҚ да қатысады. Компания сатып алу құқығымен жалға берілетін тұрғын үй тетігін дамытып, өңірлік тұрғын үй жобалары мен инженерлік инфрақұрылымды қаржыландырады.
«Бүгінде Қазақстан Тұрғын үй компаниясы тұрғын үйдің қолжетімділігін арттыру үшін бірден бірнеше құралды пайдаланады. Бұл – сатып алу құқығымен жалға берілетін тұрғын үйді ұсыну ғана емес, сонымен қатар жергілікті атқарушы органдар арқылы өңірлердегі тұрғын үй жобаларын қаржыландыру. Біздің міндетіміз – қолжетімді тұрғын үй ұсынысын кеңейтіп қана қоймай, өңірлерде оның құрылысы мен пайдалануға берілуіне қажетті жағдай жасау», – деп атап өтті «Қазақстан Тұрғын үй компаниясы» АҚ басқарма төрағасының орынбасары Исламбек Қайырбеков.
Сонымен қатар тұрғын үйді есепке алу және бөлу тетіктері жетілдірілуде. 2025 жылғы мамырдан бастап тиісті функциялар әкімдіктерден Отбасы банкке берілді. Биылғы қыркүйектен бастап ауылдық елді мекендерде жалдамалы тұрғын үйді бөлудің жаңа тәсілдері енгізілді. Сондай-ақ тұрғын үй беру кезінде отбасы құрамына қарай бөлмелер саны ескеріледі.
Іске асырылып жатқан шаралар мемлекеттік қолдаудың қолжетімділігі мен атаулылығын арттыруға, сондай-ақ азаматтардың тұрғын үй жағдайын жақсарту тетіктерін барынша түсінікті етуге бағытталған.
Председатель Комитета по делам строительства и жилищно-коммунального хозяйства Министерства промышленности и строительства Республики Казахстан Бахытжан Жунисбеков провел прием граждан.
В ходе приема рассмотрены вопросы, касающиеся разграничения ответственности за недостатки многоквартирных жилых домов, деятельности председателей объединений собственников имущества (ОСИ), а также передачи технической и иной документации на многоквартирные жилые дома.
Гражданам даны разъяснения в соответствии с действующим законодательством. Также были затронуты вопросы проведения технического обследования жилых домов, содержания общего имущества и полномочий ОСИ.
Особое внимание в ходе приема было уделено порядку взаимодействия собственников квартир с ОСИ, застройщиками и жилищной инспекцией. Гражданам разъяснили полномочия каждой из сторон и предусмотренные законодательством механизмы решения возникающих вопросов.
По итогам приема, обращения, требующие дополнительного рассмотрения, взяты в работу.
ҚР Өнеркәсіп және құрылыс министрлігінде вице-министр Қуандық Қажкенов пен Чехия Республикасы Қоршаған орта министрінің орынбасары Мартин Вайсс бастаған делегациясының кездесуі өтті.
Кездесуге ҚР Құрылыс және тұрғын үй-коммуналдық шаруашылық істері комитетінің, «ТКШ ҚазОрталығы» АҚ-ның, Чехия Республикасы мемлекеттік органдарының, сондай-ақ су шаруашылығы және коммуналдық инфрақұрылым саласында маманданған ғылыми-зерттеу ұйымдары мен компаниялардың өкілдері қатысты.
Тараптар сумен жабдықтау және су бұру жүйелерін жаңғырту, тазарту құрылыстарын салу және жаңарту салаларындағы ынтымақтастық перспективаларын талқылады. Коммуналдық салаға заманауи технологиялық және цифрлық шешімдерді енгізуге назар аударылды.
Кездесуде Қуандық Қажкенов сумен жабдықтау және су бұру қызметтерінің сапасын арттыру министрлік жұмысының басым бағыттарының бірі екенін, осы орайда қолданыстағы желілер мен нысандардың тозу деңгейін төмендетуге және коммуналдық инфрақұрылымды жаңартуға ерекше көңіл бөлініп отырғанын атап өтті.
«Энергетикалық және коммуналдық секторларды жаңғырту» ұлттық жобасы шеңберінде Министрлік желісі бойынша шамамен 8 мың км сумен жабдықтау және су бұру желілерін жаңғырту, сондай-ақ кәріздік тазарту құрылыстарының 45 жобасын іске асыру жоспарлануда.
Чехия тарапы судың мониторингі мен сапасы, ағынды суларды тазарту, су шаруашылығы объектілерін жобалау және пайдалану, сорғы жабдықтары, BIM және цифрландыру, сондай-ақ кәріз желілері мен құбырларды диагностикалау саласындағы әзірлемелерді ұсынды.
Кездесу қорытындысы бойынша тараптар коммуналдық инфрақұрылымды жаңғырту саласындағы бірлескен бастамаларды пысықтауға қызығушылық білдірді.
Қазақстан Республикасының Өнеркәсіп және құрылыс вице-министрі Қуандық Қажкенов спортшыларды құттықтап, оларға лайықты марапаттарын табыстады.
Жарысқа орталық мемлекеттік органдардың атынан 27 команда қатысып, спорттың әртүрлі түрлері бойынша бақ сынады.
Жарыс қорытындысы бойынша футзал командасы командалық ойын көрсетіп, лайықты нәтиже тіркеп, III орынға ие болды.
Сондай-ақ команда өкілі Бағдаулет Нұрберген қазақ күресінен өз салмақ дәрежесінде жеңіске жетіп, I орынды иеленді.
Сонымен қатар шахмат командасының өкілдері V орынға ие болды.
Қуандық Қажкенов жүлдегерлерді қол жеткізген нәтижелерімен құттықтап, кәсіби қызметте де, спортта да алдағы уақытта толағай табыстар тіледі.
Осындай спорттық іс-шараларға қатысу салауатты өмір салтын насихаттауға, командалық рухты дамытуға және корпоративтік мәдениетті нығайтуға ықпал етеді.
ҚР Өнеркәсіп және құрылыс вице-министрі Қуандық Қажкенов Ақтөбе облысына жұмыс сапары барысында үлестік құрылыс саласындағы проблемалы нысандардың қазіргі жағдайымен танысып, олардың құрылысын аяқтау мәселелері бойынша кеңес өткізді. Кеңесте Мемлекет басшысының «Әділетті Қазақстан: бәріміз және әрқайсымыз үшін. Қазір және әрдайым» атты сайлауалды бағдарламасы бойынша берілген тиісті тапсырмалардың орындалуына ерекше назар аударылды.
Сапар аясында жергілікті атқарушы органдар және жауапты ұйымдар өкілдерімен бірлесіп, үлестік құрылыс бойынша 11 нысандағы, оның ішінде: «Safina», «Kaspi», «Тұрғын үй 1», «Алаш Орда», «Бозжыра», «Exclusive», «Тұрғын үй 2», «СтройСервис Регион», «Жанғали» тұрғын үй кешендері және тағы басқа нысандардың қазіргі жағдайы, ондағы жұмыстардың кешеуілдеу себептері және құрылысты аяқтау мүмкіндіктері қарастырылды.
Сондай-ақ жергілікті атқарушы органдардың және уәкілетті ұйым – «Ақтөбе құрылыс Компаниясы» ЖШС өкілдерінің қатысуымен кеңес өткізілді. Онда әрбір үй бойынша қалыптасқан жағдай егжей-тегжейлі талқыланды. Тұрғын үй кешендерінің қазіргі жағдайын ескере отырып, одан әрі атқарылатын іс-қимыл алгоритмдері әзірленді. Үлестік құрылысқа қатысушы азаматтардың құқықтарын қорғауға баса назар аударылды.
Кеңес қорытындысы бойынша Қуандық Қажкенов барлық мүдделі тараптардың жүйелі өзара іс-қимылын, қабылданған шешімдердің уақтылы орындалуын қамтамасыз ету және нысандардағы жұмыстардың барысын тұрақты бақылауда ұстау қажеттігін атап өтті.
ҚР Өнеркәсіп және құрылыс министрлігі Құрылыс және тұрғын үй-коммуналдық шаруашылық істері комитеті төрағасының орынбасары Мұрат Рысдәулетов «Атамекен» ҰКП алаңында инженерлік ізденістер саласындағы өзекті мәселелерді талқылауға арналған кеңеске қатысты.
Кездесуге қатысушылар, оның ішінде бизнес өкілдері саланың түйткілді мәселелерін қарастырды. Тарата айтқанда, бірегей нысандар үшін инженерлік ізденістер нәтижелерінің қолданылу мерзімін ұзарту, орындалатын жұмыстардың сапасын бақылауды күшейту, сондай-ақ нарықты реттеу тетіктерін жетілдіру мүмкіндіктеріне назар аударылды.
Сонымен қатар инженерлік ізденістер секторында сала өкілдерін біріктіретін және тиісті жұмыстардың сапасын арттыруға ықпал ететін өзін-өзі реттейтін ұйым (ӨРҰ) құру перспективалары талқыланды.
Сондай-ақ нарықтың кәсіби қатысушылары құрылыс жобаларын іске асыру кезінде қауіпсіздікті қамтамасыз ету, нормативтік базаны одан әрі жетілдіру және басқа да мәселелер бойынша пікір алмасты.