Меню
«Авиценна: Денсаулық сақтау» бағдарламасы Студенттердің академиялық ұтқырлығы:
Бағдарламаның мақсаты Орталық Азия елдері арасында денсаулық сақтау саласында адами капиталды дамыту және академиялық білім алмасу болды. 2024 жылғы сәуірде медициналық жоғары оқу орындарының студенттері Астана медицина университетінде «Мүшелер мен жүйелердің патологиялық физиологиясы» және «Педиатриядағы радиология» пәндері бойынша оқу курсынан табысты өтті.
Бағдарламаға Қырғыз Республикасы мен Тәжікстан Республикасынан 17 студент қатысты. Оқу сабақтарынан бөлек, қонақтар арнайы бағдарлама аясында елорданың мәдени орындарымен танысты. Оқу соңында қатысушылар алған білімдерін жоғары бағалап, академиялық ынтымақтастықты одан әрі кеңейтуге мүдделілік танытты.
«Авиценна: Денсаулық сақтау» бағдарламасы Оқытушылардың біліктілігін арттыру:
Бағдарламаның мақсаты медициналық жоғары оқу орындары оқытушыларының біліктілігін арттыру және Орталық Азия елдерінің медициналық мекемелері арасындағы ынтымақтастықты нығайту болды. Курстар 2024 жылғы 17-23 қазан аралығында Түрік ынтымақтастық және үйлестіру агенттігімен (TIKA) және Астана медицина университетімен бірлесіп өткізілді.
Оқудан И.К. Ахунбаев атындағы Қырғыз мемлекеттік медицина академиясының, Ош мемлекеттік университетінің және Әбу Әли ибн Сино атындағы Тәжік мемлекеттік медицина университетінің 10 өкілі өтті. Дәріскерлер ретінде Түрік Республикасы мен Қазақстан Республикасының жетекші мамандары сөз сөйледі. Бағдарлама қорытындысы бойынша барлық қатысушыларға сертификаттар табыс етілді.