Қарағанды облысының хореографиялық ансамблі Түркияда өтетін халықаралық байқауға жолдама алды

Астанада Flash Star халықаралық көп жанрлы байқауының республикалық кезеңі аяқталды. Нұра ауданының "Шұғыла" ансамблі Гран-при жеңіп алды.

Байқауға Қарағанды облысы, Астана, Алматы және Қызылорда қалаларынан 15 ұжым қатысты.

– Әрине, бәсекелестік жоғары болды. Біздің балалар ұлттық би билеп, өнер көрсетті. Қазылар алқасының шешімімен "Бабалар мұрасы" биін орындаған аға топ (13–16 жас) Гран-при алды. Бұл бізге Түркияда өтетін байқаудың халықаралық кезеңіне қатысуға құқық береді, – деді Нұра ауданы мәдениет үйінің хореографы Нұрқұлан Хасымхан.

Сондай-ақ, "Шұғыла" ансамблі "Драйв" заманауи биі үшін екінші орынды иеленді. Ұжымның кіші тобы "Құрбылар" ұлттық биімен үшінші орынға ие болды.