«Бұл менің қоқысым емес, бірақ бұл менің планетам» - Қарағандыда алғашқы жазғы сенбілік өтті

Маусымның соңғы күні Қарағандыда осы маусымда алғашқы қоғамдық сенбілік өткізілді. Тек Орталық саябақта 38 қап қоқыс жиналды.

Сенбілікке 27 адам қатысты, оның ішінде тазалық акциясына Birgemiz taza alem республикалық қозғалысының аймақтық штабының еріктілері ат салысты.

Шара «Қарағанды облысының Табиғи ресурстар және табиғатты пайдалануды реттеу басқармасы» ММ қолдауымен ұйымдастырылды.

Бұл жолы еріктілер Орталық саябақта және Каскад алаңында футбол добы бар тұғырдың сол жағындағы аумақты тазартты. Қоқысты бөлек жинап, оны қайта өңдеуге тапсырды.

- Дәстүр бойынша біз қайта өңдеуге барған пластик жинадық. Сондай-ақ, «Радость» қайырымдылық дүкеніне беретін бөтелкелердің қақпақтарын жинадық.  Саябақта барлығы 38 қап қоқыс жинадық. Біздің міндетіміз қоқыстарды жинау ғана емес, жинауға барынша көп адамдарды тарту, ластану ауқымын көрсету. Біздің ұранымыз – «Бұл менің қоқысым емес, бірақ бұл менің планетам», - деді сенбілікті ұйымдастырушылардың бірі Дамир Кәрімов.