Ермағанбет Бөлекпаев тұрғындардың сұрақтарына тікелей эфирде жауап берді
Қарағанды облысының тұрғындары аймақ басшысы Ермағанбет Бөлекпаевқа тікелей сұрақтар қойды. SARYARQA телеарнасында облыс әкімінің тікелей эфирі өтті.
Өтініштерді жинау үшін барлық коммуникациялар тартылды: WhatsApp, әлеуметтік желілер, көшедегі сауалнама. Call-орталық операторлары хабар тарату кезінде 60-тан астам қоңырау қабылдады. Мәселелердің басым бөлігі коммуналдық және әлеуметтік салаларға қатысты болды.
Шахтинск тұрғындарын жергілікті ЖЭО жұмысын тұрақтандыру мәселесі толғандырады.
– Проблемалар басым бөлігі көмірдің сапасына байланысты болды. Боран кезінде ол қатты ылғалданған еді. Шаралар қабылданды, қысқа уақыт ішінде станция ауа райы бойынша өз деңгейіне көтерілді, – деп түсіндірді Ермағанбет Бөлекпаев. – Шахтинск ЖЭО-да көп жылдардан бері күрделі жөндеу жүргізілген жоқ. Өткен жылы қазандықтарды жөндеуге қаражат бөлінді. Биыл жабдықты жаңарту жалғасады.
Облыс әкімі өңірдің барлық жеті станциясы бойынша 2024 жылға арналған жөндеу бағдарламасының көлемі бекітілгенін айтты. Теміртауда ЖЭО-2-де жетінші қазандықтың құрылысын аяқтау міндеті тұр.
Жолдарға қатысты да көптеген сұрақтар болды. Ермағанбет Бөлекпаев Шахан – Шахтинск автожолын күрделі жөндеуден өткізу жағдайын түсіндірді. Жұмыс 2019 жылы басталды, бірақ мердігер сенімсіз болды. Сот процестерінен кейін ол банкрот деп танылды. Содан кейін орындалған жұмыстарға аудит жүргізуге тура келді. Сондай-ақ, жобалық-сметалық құжаттаманы түзету қажет болды. Конкурс арқылы жаңа мердігер анықталды. Өткен жылы бұл компания дайындық жұмыстарын жүргізіп, биыл күрделі жөндеуді бастайды.
Қарағанды – Қарқаралы жолын кезең-кезеңімен ретке келтіреді. Биыл жөндеу жұмыстары жалғасады, тағы 50 шақырым жол жөндеу жоспарлануда.
Бұқар Жырау ауданы Петровка ауылының тұрғыны биліктің клуб салуға берген уәдесін еске салды. Облыс әкімі мұндай жоспарлар бар екенін, ЖСҚ әзірленгенін және республикалық бюджеттен қаржыландыруға өтінім берілгенін растады.
Барлық сұрақтарға жауап беру үшін бір сағаттық Тікелей эфир жеткіліксіз болды. Бірақ бірде-бір үндеу назардан тыс қалмайды. Эфир барысында айтылмаған сұрақтарға жауаптар Қарағанды облысы әкімдігінің ресми аккаунттарында және сайтында беріледі.