Абай ауданының ауылдық мектептерінде жетілдірілген интерактивті кабинеттер пайда болады
Абай ауданында Qazaqstan halqyna Ұлттық қорының қаражаты есебінен бес ауыл мектебі жаңғыртылуда. Оларда жетілдірілген интерактивті кабинеттер пайда болады.
Сондай-ақ, мектептер заманауи жайлы жиһаздармен және электр энергиясымен үздіксіз қамтамасыз ету үшін генераторлармен жабдықталады.
Абай ауданының әкімі Сәбит Оспанов Өңірлік коммуникациялар қызметі платформасында өткен брифингте ауылдық мектептерді жаңғырту және ауданның әлеуметтік-экономикалық дамуы туралы айтып берді.
– Qazaqstan halqyna қоры білім беру жүйесін дамытуға жаңа мүмкіндіктер береді. Өткен жылы Қор қаражаты есебінен Абай қаласындағы Ш. Уәлиханов атындағы мектеп-лицей жаңғыртылды. Ол интерактивті пәндік кабинеттермен, инновациялық зертханалармен жабдықталған. Биыл тағы бес ауыл мектебін осындай өзгеріс күтуде, – дейді Сәбит Оспанов. – Сондай-ақ, "Болашақ инженерлері" республикалық жобасы аясында 17 мектеп робототехника кабинеттерімен жабдықталады.
Ауданда медициналық қызмет көрсету сапасын арттыру үшін сегіз денсаулық сақтау нысанының құрылысы жоспарланған. Бұл төрт медициналық пункт, екі дәрігерлік амбулатория және екі ФАП.
Ауданда тұрғын үй-коммуналдық шаруашылық саласына да көп көңіл бөлінеді. Биыл жалпы ұзындығы 4,1 км болатын Абайдың жылу желілерін жөндеу жұмыстары жоспарланған. "Абай" және "Қарабас" сорғы стансаларында жабдықтар ауыстырылады. Южный кентіндегі қазандықты және Топардағы жылу желілерін жөндеу жоспарланған. Бұл шаралар жылу желілерінің тозуын қала бойынша 68-ден 64%-ға дейін және аудан бойынша 67-ден 62%-ға дейін төмендетуге мүмкіндік береді.
– Абайда орамішілік кәріз желілерін ауыстыру және Агроқалашықтағы қысымды коллектор учаскесін жөндеу жоспарлануда, – деп атап өтті әкім. – Автомобиль жолдарын жөндеуді жалғастырамыз. Жартас – Долинка жолының учаскесінде 3 км жөндеуді және Тасзаимка ауылына кірме жолды қайта жаңартуды аяқтаймыз. Абайда 4,5 км автожолға орташа жөндеу жүргіземіз. "Ауыл – Ел бесігі" арнайы жобасы бойынша ауданның бес ауылдық елді мекенінде жалпы ұзындығы 14 км кентішілік жолдарға орташа жөндеу жүргізілетін болады. Қаланың аулаішілік аумақтарын асфальттауды жалғастырамыз.