«Басты міндет – адам қауіпсіздігі» қағидаты бойынша: Қарағандыда жаңа учаскелік полиция пункті ашылды

Қарағандыда, Оңтүстік-Шығыста жаңа учаскелік полиция пункті пайда болды. Ол Тәттімбет көшесіндегі "Кристалл" тұрғын үй кешенінде орналасқан және шамамен 7 мың адамға қызмет көрсететін болады. 

Қадамдық қолжетімділік шегінде орналасу азаматтармен тығыз ынтымақтастыққа бағытталған. Басты міндет – қылмыстар мен құқық бұзушылықтардың алдын алу, қоғамдық тәртіп пен қауіпсіздікті нығайту.

Жаңа УПП ашылуына Қарағанды облысы әкімінің орынбасары Ерлан Құсайын, Қарағанды облысы ПД бастығының бірінші орынбасары Құрманғали Исмағұлов қатысты.

– Учаскелік полиция пункті 2024–2028 жылдарға арналған қоғаммен серіктестікте қоғамдық қауіпсіздікті қамтамасыз ету тұжырымдамасы шеңберінде облыс әкімдігінің қолдауының арқасында ашылды. Негізгі міндеттердің бірі – қауіпсіз қоғам құру үшін құқық қорғау органдарының азаматтармен өзара іс-қимылының сервистік моделіне көшу, «Басты міндет – адам қауіпсіздігі» қағидаты бойынша мемлекеттік басқару, –  деп атап өтті Құрманғали Исмағұлов.

Ол жаңа УПП базасында цифрлық шешімдер жобалары енгізілетінін хабарлады. Жұмыс ең алдымен заң бұзушылықтарға нөлдік төзімділікті қалыптастыруға, тұрмыстық зорлық-зомбылықтың, кәмелетке толмағандар арасындағы құқық бұзушылықтардың алдын алуға бағытталған, деп атап өтті облыстық ПД бастығының бірінші орынбасары.

Ерлан Құсайын жергілікті билік полицияға одан әрі көмек көрсететінін айтты. Биыл облыс әкімдігінің қолдауымен 19 учаскелік полиция пунктінің үй-жайларына жөндеу жұмыстары жүргізіледі.

Қарағанды облысы ПД баспасөз қызметінің ақпараты бойынша