Қарқаралы ауданындағы шалғай ауыл интернетпен қамтамасыз етілді

Қарқаралы ауданы Қаракөл ауылының тұрғындары интернетпен қамтамасыз етілді. Енді олар 4G байланысын пайдалана алады.

Қаракөл ауылы Қарқаралы ауылынан 70 шақырым және Егіндібұлақ ауылынан 15 шақырым жерде орналасқан. Мұнда 165 адам тұрады. Бұған дейін олардан ұялы байланыс пен интернеттің сапасына бірнеше рет шағымдар түскен. Мәселе азаматтардың өңір басшысымен кездесуден кейін шешілді.

– Біз бұған дейін көрші ауылдан интернет пен байланысты пайдаланғанбыз. Бірақ интернет жылдамдығы төмен болатын, абоненттер ғимараттарға кірген бойда байланыс үзілетін. Енді мұндай проблемалар жоқ, – дейді Қаракөл ауылдық округінің әкімі Ахат Оспанов. 

Осы жылы Қаракөлде ауылға кіре берістегі және елді мекен ішіндегі жолдардағы су өткізгіш құрылымдар саны да артты. Олар су тасқыны кезінде еріген қар суынан сақтануға көмектеседі.

Келесі жылы тұрғындардың өтініші бойынша заманауи балалар ойын алаңын орнату жоспарлануда. Сондай-ақ мәдениет үйін күрделі жөндеу жоспарланған.